Қор нарығына шолу: АҚШ-тағы өнеркәсіп өндірісінің өсімі, Deutsche Bank оптимизмі, UBS кеңестері
The Deutsche Bank құбылмалылықтан қорықпауға шақырып, нарықтардағы оптимизмнің бес себебін атап көрсетті. Тамыз айының қорытындысы бойынша АҚШ-тағы өнеркәсіптік өндіріс көлемі болжамдардан да жоғары өсім көрсетті. UBS экономиканың баяулауы кезінде оң әсер ететін қорғаныс акцияларын атады. Осы және өзге де тақырыптар туралы 17 қыркүйекке арналған шолудан оқыңыз.
Deutsche Bank: акциялар нарығындағы оптимизмнің бес себебі
Deutsche Bank макростратегі Генри Аллен құбылмалылықтан қорықпауға шақырады. Оның пікірінше, нарықтардағы оптимизмнің бес себебі бар деп жазды Market Watch.
Біріншіден, ФРЖ ақша-несие саясатын жеңілдету циклін бастағалы жатыр. «Мұндай жағдай орын алған кезде экономикадағы ахуал да біртіндеп баяулайды», – дейді Аллен.
Екіншіден, әлемдегі экономикалық деректер рецессиядан қашық екенін көрсетіп жатыр.
Үшіншіден, ФРЖ ставкаларын төмендету әлеуеті қаржылық жағдайды жеңілдетіп үлгерді. Ал басқа елдердің орталық банктері де қарыз алу құнын төмендете бастады. Бұл тұтастай алғанда қысқамерзімді перспективада экономикалық өсуді қолдауға көмектесуі керек.
Төртіншіден, тәуекел активтері биыл әртүрлі күйзелістерге айтарлықтай төзімді болды. Аллен 2023 жылдың қазан айында S&P 500 өзінің соңғы раллиін басталы бері кез келген кері қайтару мен құбылмалылықтан тез қалпына келгенін атап өтті. «Әсіресе осы жылы инфляция рецессияның айқын белгілерінсіз төмендей бергенін ескерсек, нарықтардың тіпті қиын кезеңдерде де тұрақты болғаны макроэкономикалық жағдайдың әлі де оң екенін көрсетеді», – дейді Аллен.
Қыркүйек маусымдық «сипатқа» ие. Сондықтан нарық төртінші тоқсанға көз тастай беруі мүмкін. Бұл тарихи акциялар үшін ең күшті кезеңдердің бірі болып саналады. Жылдың соңғы үш айы әдетте S&P 500-ді кез келген тоқсанға қарағанда жақсы кірістілікпен қамтамасыз етіп, қуантатыны бар.
АҚШ-тағы өнеркәсіптік өндіріс тамыз айында қалпына келуін жалғастырды
Тамыз айында АҚШ-тағы өнеркәсіптік өндірістің өсімі қалпына келді деп хабарлады Reuters. Бұл көрсеткіш 0,9%-ға дейін, шілде айынан бастап 0,7%-ға дейін өсті (ФРЖ мәліметтері бойынша). Reuters сауалнамасына қатысқан экономистер өнеркәсіптік өндіріс 0,3% өседі деп болжады.
Өндірістік белсенділік құрылымында зауыттар жылдық мәнде 0,2%-ға өскенін көрсетті. Автомобиль өнеркәсібі және бөлшектерді шығару өткен айда 9,8%-ға артты. Ұзақмерзімді тауарлар өндірісі тамыз айында 2,1% өсім көрсетті.
Сондай-ақ аэроғарыш саласында және көлік жабдықтарын шығаратын өнеркәсіптік нысандарда өндіріс өсті. Бірақ әртүрлі ұзақмерзімді өнеркәсіптік тауарларды өндіру 0,9%-ға төмендеді. Полиграфиялық өнімдерді, сондай-ақ мұнай және көмір өнімдерін өндірудің қысқаруына байланысты өңдеу өнеркәсібіндегі азық-түлік емес тауарларды өндіру көлемі 0,2%-ға кеміді.
Өнеркәсіптік қуаттылықтың жүктемесі шілдедегі 77,4%-дан 78%-ға дейін өсті. Бұл 1972-2023 жылдардағы орташа көрсеткіштен 1,7 пайыздық тармаққа төмен. Өндірістік сектордағы операциялық көрсеткіш өткен айдағы 76,6%-дан 77,2%-ға дейін артты. Бұл ұзақ мерзімді орташа көрсеткіштен 1,1 пайыздық тармаққа төмен.
Экономиканың 10,3%-ын құрайтын өңдеу өнеркәсібі қарыз алу шығындарының жоғарылауына байланысты әлі де зардап шегіп отыр. Агенттік атап өткендей, мәселені шешу ФРЖ-ның жұмсарту динамикасына байланысты болады.
UBS: экономиканың баяулауы акцияларды сатып алуға мүмкіндік береді
UBS сарапшылары әлемдік экономиканың баяулауынан акцияларды сатып алу мүмкіндігін көріп отыр деп жазды Market Watch. Олардың пікірінше, коммуналдық қызметтер мен фармацевтика сияқты негізгі секторларды қарастыруға болады.
UBS S&P 500 индексіндегі негізгі бағыттардың бірі – коммуналдық секторда 2024 жылы 24%-дық өсімді болжап отыр. Сарапшылар нақты компаниялардың ішінде Constellation Energy акцияларын ұсынады. Оның акциялары 2024 жылдың басынан бері 70%-ға өсті. Бұл компанияның қағаздарын бақылайтын 18 сарапшының 12-сі акцияларды сатып алуға кеңес береді. Акциялардың орташа мақсатты бағасы 220,03 долларға тең. Бұл дүйсенбі күнгі сауда-саттық жабылғаннан кейінгі 10%-дық өсім әлеуетін білдіреді.
Фармацевтика секторында Eli Lilly көрсетілген. Constellation сияқты бұл компания да биыл айтарлықтай өсімге қол жеткізді (+58%). Бұған қант диабетін емдеуге арналған Mounjaro және салмақ тастауға арналған Zepbound препараттарына деген сұраныс ықпал етті. LSEG мәліметтері бойынша, сарапшылардың шамамен 82%-ы осы компанияның қағаздарын сатып алуды ұсынады. Олардың орташа мақсатты бағасы 1 003,35 долларға тең. Бұл 8%-дық өсім әлеуетін білдіреді.
UBS тізімінде Extra Space Storage де бар. Оның акциялары 2024 жылы шамамен 11% қосты.
Бидай бағасы өсіп, жеткізілімнің төмендеуі байқалып отыр
Ресей мен Украинаның бидайдың әлемдік жеткізілім көлеміне әсер ететін негізгі егістік алқаптары орналасқан Қара теңіз аймағындағы құрғақшылық (әлемдік көлемнің төрттен бір бөлігі) келесі маусымда бидай нарығы үшін ықтимал қауіптер барын ертерек еске салады, деп хабарлады Bloomberg. Астық бағасы жақында маусымнан бастап ең жоғары деңгейге жетті. Дегенмен Чикагодағы биржада бидай фьючерстері 2022 жылғы ең жоғары көрсеткіштен 50% төмен екенін еске сала кеткен жөн.
Әлемдік қорлардың тапшылығын АҚШ ауыл шаруашылығы министрлігі де растады. Ведомство осы маусымда қорлар тоғыз жыл бұрынғы ең төменгі деңгейде болады, жеткізілімдердің қысқару белгілері бар, деп болжам жасады. Ресей мен Украинадағы құрғақшылық пен ыстық күздік дақылдарды егуге, өз кезегінде бұл келесі маусымның өнімділігіне әсер етеді. Бұл аймақтардағы температура климаттық нормадан жеті градусқа жоғары. IKAR мәліметтері бойынша, ресейлік фермерлер майлы дақылдарды қоспағанда, қыста 6,3 миллион гектар (15,5 миллион акр) екті. Бұл – жылдың осы уақытындағы он жылдан астам кезеңдегі ең төменгі көрсеткіш. Украинаның егіс алқабы өткен жылғы көрсеткіштің жартысына жуығын құрайды.
