Бишімбаевтың әкесі елде университет аша ма?

Бишімбаевтың әкесі елде жеке университет ашқалы жатыр деген ақпарат тарады / Фото: facebook.com; бильд-редактор: Ахтам Зиперов

Желіде Қуандық Бишімбаевтың әкесі Уәлихан Бишімбаевтың Қызылорда қаласында жекеменшік университет ашатыны туралы ақпарат тарады. Бұл ақпаратты Ғылым және жоғары білім министрлігі растамады.

Ғылым және жоғары білім министрлігінің баспасөз қызметінің мәліметінше, Қазақстан Республикасының «Білім туралы» Заңының 5-3-бабына сәйкес, мұндай оқу орындарын ашу үшін арнайы лицензия керек. Ал бұл құжатты тек Ғылым және жоғары білім саласындағы уәкілетті орган, яғни Ғылым және жоғары білім министрлігі ғана бере алады.

Қазақстан Республикасының «Рұқсаттар және хабарламалар туралы» Заңына сәйкес, жеке және заңды тұлғалар бұл рұқсат құжатын алмай немесе хабарлама жібермей оқытуға қатысты қызметтерді жүзеге асыра алмайды.

«Жоғары және жоғары оқу орнынан кейінгі білім беру саласындағы кез келген білім беру қызметі міндетті түрде лицензиялануға жатады. Жоғарыда айтылғандарды негізге ала отырып, Министрлік «Bishimbayev University» атауымен білім беру қызметін жүзеге асыруға лицензия берілгенін жоққа шығарады, сондай-ақ «е-лицензиялау» ақпараттық жүйесінде тиісті өтінімнің болмағанын хабарлайды», – делінген баспасөз хабарламасында.

Айта кетсек, бүгін, 3 сәуірде әлеуметтік желіде Қуандық Бишімбаевтың әкесі жекеменшік университет ашайын деп жатқаны туралы ақпарат тараған болатын. Ақпаратта университеттің заңгерлерді даярлайтыны туралы айтылған еді.

Ал бұрынғы Ұлттық экономика министрі азаматтық некедегі жарын өлтіргені үшін 24 жылға сотталған болатын.