Польшада негізсіз тұтқындалған Қазақстан азаматы босатылды

28 сәуір күні Польша Республикасының аумағында бұған дейін тұтқындалған Қазақстан азаматы бостандыққа шықты. Бұл туралы президенттің баспасөз хатшысы Айбек Смадияр хабарлады.

Бұл күрделі мәселенің оң шешілуіне бірнеше мемлекеттің конструктивті ынтымақтастығы негіз болды. Мемлекет басшысы осы жағдайға байланысты бірқатар халықаралық деңгейдегі келіссөздер мен алғыс білдіру шараларын атап өтті:

Қасым-Жомарт Тоқаев Беларусь Президенті Александр Лукашенкомен телефон арқылы сөйлесіп, қиын сәттегі екі елдің үйлесімді іс-қимылы үшін ризашылығын білдірді. Сондай-ақ, президент оңтайлы нәтижеге қол жеткізуге маңызды ықпал еткен Ресей Президенті Владимир Путинге де алғыс айтты.

Бұдан бөлек Тоқаев Польша Президенті Кароль Навроцкий мен Премьер-министр Дональд Тускке орын алған жағдайға байланысты байыпты әрі әділ шешім қабылдағаны үшін арнайы ризашылық хатын жолдамақ.

Еске сала кетейік, бұған дейін Польшада тағы бір қазақстандық жоғалып, артынша өлі күйінде денесі табылған еді.