Қараша айының алғашқы аптасының бірде-бір күні бос емес. Күнде дерлік концерт. Бұл – әнсүйер, өнерсүйер оқырмандар үшін керемет жаңалық екені сөзсіз. Kursiv.kz еліміздің әр өңірінде өтетін қарашаның алғашқы концерттерінің тізімін әзірледі.
Мақпал Жүнісова, Бауыржан Рахымбеков Өскемен қаласында
4 қараша, Өскемен қаласы
4, 5 октаваға шарықтайтын драмалық сопрано иегері, қазақ эстарасының ерке қызы аталып кеткен жезтаңдай әнші Мақпал Жүнісова өз шығармашылығы арқылы халық музыкасын дәріптеуге елеулі үлес қосты. Ол алдағы апта сүйікті тыңдарманымен қайта қауышпақ. Аптаның бірінші күні өскемендік өнерсүйер жұртшылық осы кешке ағыла жиналатынына күмән жоқ.
Концерттік бағдарламаға кіретін композициялардың қатарында бір ғасырға татитын «Екі жұлдыз», «Достар-достар», «Бақытты болыңдар», «Биле, биле», «Қызғалдақтар» әндері де бар.
Әртіс қазақстандық сахнаның басқа жұлдыздарымен бірге сахна төрінде жиі өнер көрсетеді. Оның өнердегі үзеңгілес құрдас әншілермен жазған дуэті де, жас буын өкілдерімен орындаған әндері де тыңдарман ықыласына бөленіп жүр. Ал Өскеменде әнші Бауыржан Рахымбековпен бірге де өнер көрсетеді.
Кеш Өскемендегі Кеншілер мәдениет сарайында өтеді. Басталуы: сағат 19:00-де.
Билеттер Ticketon.kz сайтына жүктелген.
Әбдіжаппар Әлқожаның шығармашылық кеші
5 қараша, Астана қаласы
Белгілі қазақстандық әртіс Әбдіжаппар Әлқожа елордалық тыңдармандары өзінің үлкен концертіне шақырады! Әнсүйер қауымның жүрегін өзінің сезімтал әндерімен және қуатты дауысымен бағындырған әнші шығыс төрінде хит болған әндерін орындап, жанкүйерлерін қуантуға асық.
Бұл кеш оның шығармашылығының барлық жанкүйерлері үшін ерекше болары кепіл. Ұйымдастырушылар бұл кеш қонақтарын ырғақты ән, керемет би, ерекше бағдарлама мен заманауи музыка күтеді деп уәде беріп отыр. Ал әншінің өзі концерт қонақтардың көңілін шығып, ұмытылмастай есте қалуы үшін барын салары анық.
Осынау керемет музыкалық мерекенің куәгері болу және әсем ән және де шексіз шабытқа толы кеш өткізу мүмкіндігінен қапы қалмаңыздар! Ырғақты ән тыңдап, қаласаңыз қосыла шырқап, тербеле би билеп, бір демалып қайтыңыз.
Кеш Астанадағы филармония залы ғимаратында өтеді. Басталуы: сағат 19:30.
Билеттерді Ticketon.kz сайтынан ала аласыз.
Aspan FM музыкалық премиясы
6 қараша, Алматы
ASPAN FM радиосы ашылғанына бір жыл болуына орай мега шоу өткізбек.
Радиостанция туған күніне орай тыңдарманды алғашқы ASPAN музыкалық премиясын көруге шақырады!
Бұл – Қазақстанның заманауи музыка, шоу-бизнес индустриясын дамыту саласындағы жетістіктері үшін жыл сайынғы марапаттау рәсімі. Ұйымдастырушылар бұл әртістерді емес, үздік әндерді марапаттайтын премия болады деп уәде беріп отыр.
Премияның айрықша ерекшелігі — радио тыңдаушылардың ашық дауыс беруі (тест) арқылы таңдаған сүйікті әндерінен тұрады.
Музыкалық радио премия танымал әртістер мен шақырылған жұлдыздардың қатысуымен өтеді! Кешке келген көпшілікке арнап Мейрамбек Беспаев, Сәкен Майғазиев, Қайрат Нұртас, Raim, Ерке Есмахан, ADAM, Жұбаныш Жексенұлы, Айқын, Әбдіжаппар Әлқожа, Ғазизхан Шекербеков, Мадина Сәдуақасова, Ернар Айдар, Kalifaniya, Серік Ибрагимов, Turar, Amre, Ilhan Ihsan, Тоқтар мен Бейбіт, Жанболат пен Жазира, «Заман» тобы мен Диана Исмаил сияқты танымал әншілер өнер көрсетеді.
Концерт 6 қараша күні сағат 19:00-де Алматыдағы Республика сарайында өтеді.
Билеттерді Ticketon.kz сайтынан тааб аласыз.
Бағжан Октябрь «Жан терапиясы» концерттік бағдарламасымен Павлодар қаласында
8 қараша, Павлодар қаласы
Қазақстандағы ең танымал виолончелистердің бірі Бағжан Октябрь де қазір қызу жұмыс істеп, гастрольдік сапармен ел аралап жүр. Ол алдағы аптада Ақтау сахнасында өнер көрсетпек. Ол бұл күні тыңдарман алдына «Жан терапиясы» атты жаңартылған бағдарламасымен камералық оркестр сүйемелдеуімен шығады. Бағжан әлемнің түкпір-түкпіріндегі ең көркем жерлерде виолончель аспабында ойнаған видеолары арқылы танылды. Ол түрлі танымал көркем туындыларды виолончель ырғағына келтіріп, көптің жүрегін жаулады. Оның эстетикаға толы видеолары әлеуметтік желіде жылдам тарап кетті.
Қазіргі таңда музыкант Қазақстанда ғана емес, Қырғызстанда, Өзбекстанда және Түркияда өз концерттерін сәтті өткізіп жүр. Елдегі концерттерімен қатар, шетелдегі кештері де аншлагпен өтіп жатады. «Жан терапиясы» – бұл виолончельдің жан тебірентетін, сезімтал дыбыс толқыны.
Ерекше кештен қапы қалмаңыз. Үнемі аншлагпен өтетін кешке әлі де билет алып үлгересіз.
Керемет концерт Павлодар қаласындағы Естай атындағы мәдениет сарайында өтеді. Басталуы сағат 19:00-де.
Билеттер Ticketon.kz сайтына жүктелген.
ASLANBI-дің Астана қаласындағы ретроконцерті
9 қараша, Астана
Алдағы сенбі күні астаналық әнсүйер қауым керемет ностальгия кешіне бара алады. Себебі жас әнші, вокал бойынша халықаралық байқаулардың лауреаты Асланби Ниязбеков елорда төрінде ретроконцерт өткізбек. Концертте джаз тобының сүйемелдеуімен Батырхант Шүкеновтің, Мүслім Магомаевтың, Франк Синатраның репертуарынан алынған ретро хиттер шырқалады. ASLANBI атымен танылған жас әншінің бейнебаяндары интернет желісінде миллиондаған қаралым жинап жүр. Бұл кеш отбасыңызбен, жақыныңызбен, дос-құрбыңызбен, сүйіктіңізбен уақытты ұмытылмас өткізуге керемет мүкіндік.
Кеш барлық буынды қаимтымақ. Себебі классикаға айнадған, баршаның жадында жатталып, тыңдарман жүрегінен ерекше орын алған әндер осы кеште шырқалады. Оның қатарында «Твои шаги», «Сағындым сені», «Синяя вечность», «Just The Two Of Us», «Sway», «Can’t help falling in love» және тағы басқа танымал әндер бар.
Концерт 9 қараша күні Астанадағы Мәңгілік Ел даңғылы бойында орналасқан, «Nomad City Hall» ғимаратында өтеді. Кеш сағат 19:00-де басталады.
Билеттерді Ticketon.kz сайтынан таба аласыз.
Заттыбек Көпбосынұлының Шымкент қаласындағы ән кеші
10 қараша, Шымкент
Халықтың сүйікті әншісіне айналған Заттыбек Көпбосынұлы жерлестеріне арнап «Нартәуекел» деген атаумен концерт бермек. Халық арасында тараған «Ақ маржан», «Немерем», «Бүлдірген» тағы басқа көптеген хит әндердің орындаушысы алдағы аптада, 10 қараша күні, Шымкент төрінде ән кешін өткізбек. Заттыбектың әндері орындалып, Шымкент халқы жиналған жайдары кештің көңілді өтеріне күмәніміз жоқ.
Бұл – тек ән кеші емес, көңілді би кеші, әсерлі әңгіме кеші болмақ. Кещ Шымкенттегі Tulip hall ғимаратында өтеді. Басталуы: 19:00.
Билеттерді Ticketon.kz сайты арқылы сатып ала аласыз.
