Төтенше жағдайлар министрлігі арнайы техниканың өтуіне кедергі келтіретін көліктерді итеріп немесе соғып өту нормасын енгізуден бас тартты.
Астанадағы «Көркем-3» тұрғын үй кешенінде орын алған қайғылы өрттен кейін желі қолданушылары құтқарушыларға кедергі келтірген көліктерді соғып болса да өту құқығын беруді ұсынған болатын. Алайда ведомство бұл ұсыныстың заңдық тұрғыдан қабылданбайтынын ресми түрде мәлімдеді.
ТЖМ бұл норманың енгізілмеуіне бірнеше негізгі себеп келтірді:
- Жеке меншік құқығы: Конституция бойынша азаматтардың мүлкі қорғалады.
- Заңнамалық негіздің жоқтығы: Қолданыстағы заңда азаматтардың көлігін қасақана зақымдауға рұқсат беретін тікелей норма қарастырылмаған.
- Жүйелі тәуекелдер: Ондай норманы қолданудың нақты критерийлері жоқ, бұл сот дауларының көбеюіне және бюджетке қосымша салмақ түсуіне әкеп соғады.
Министрліктің түсіндіруінше, жолды бөгеген көліктерді эвакуациялау – полицияның міндеті. «Көркем-3» кешеніндегі өрт кезінде де тұраққа қойылған машина тек биіктікке арналған техниканың кіруіне кедергі келтірген, ал құтқарушылар негізгі өрт сөндіру жұмыстарын подъезд ішіндегі байланыс желілері арқылы дереу бастаған.
12 сәуірде елордадағы көпқабатты үйде болған өрт үш баланың өмірін қиды. Тұрғын үй ауласындағы темір қақпалар мен тығыз тұрақ құтқару жұмыстарына айтарлықтай қиындық тудырған. Кейіннен полиция жолды бөгеген жүргізушіге айыппұл салды.
