Эквадордың бұрынғы сыртқы істер министрі Мария Фернанда Эспиноса Біріккен Ұлттар Ұйымының келесі басшысы лауазымына таласатын бесінші кандидат болды.
Эспиносаны Антигуа және Барбуда ұсынды. Ол жыл соңында қызметінен кететін БҰҰ Бас хатшысы Антониу Гутерриштің орнына ұсынылып қойған өзге төрт кандидаттың қатарына қосылды.
Өз елінде Қорғаныс министрі де болған эквадорлық әйел 2018 жылдың қыркүйегінен 2019 жылдың қыркүйегіне дейін Бас Ассамблеяның президенті қызметін атқарды.
Бұған дейін жазғанымыздай, БҰҰ-ның келесі Бас хатшысы лауазымына өзге үміткерлердің қатарында чилилік Мишель Бачелет, аргентиналық Рафаэль Гросси, коста-рикалық Ребека Гринспен және сенегалдық Маки Салл бар. Бұл төртеуінен сәуір айында мүше мемлекеттер жария түрде сұхбат алған болатын, кез келген жаңа кандидат та осы процестен өтеді.
Географиялық ротация дәстүріне сәйкес, БҰҰ-ның келесі Бас хатшысын ұсыну кезегі Латын Америкасына тиесілі. Сондай-ақ, көптеген мемлекеттер бұл лауазымға алғаш рет әйел адамның тағайындалуын қолдап отыр.
БҰҰ-ның барлық мүше мемлекеттері өкілдік ететін Бас Ассамблея Бас хатшыны бес жыл мерзімге сайлайды, бұл мерзім бір рет ұзартылуы мүмкін. Бірақ олар мұны шілде айының соңына қарай іріктеу процесін бастауы тиіс БҰҰ Қауіпсіздік Кеңесінің ұсынысы бойынша ғана жасай алады.
Қауіпсіздік Кеңесінің бес тұрақты мүшесі – Америка Құрама Штаттары, Қытай, Ресей, Ұлыбритания және Франция ерекше билікке ие, олардың әрқайсысы шешімдерге вето қоя алады.
Бас хатшы болып сайланған тұлға өз жұмысын 2027 жылғы 1 қаңтарда бастайды.
