Ұлттық тестілеу орталығы білім гранттары конкурсына құжат қабылдау мерзімін жариялады.
Грант конкурсына құжат қабылдау 2026 жылғы 13-20 шілде аралығында өтеді.
«Құжаттарды жоғары оқу орындарының қабылдау комиссиялары арқылы офлайн (виртуалды қабылдау комиссиялары арқылы онлайн) немесе eGov арқылы онлайн тапсыруға болады«, – делінген хабарламада.
Грант конкурсына қатысу үшін қандай құжаттар қажет?
- жеке куәлік;
- ҰБТ сертификаты;
- 3х4 көлеміндегі фото;
- орта білім туралы аттестат немесе колледж түлектері үшін диплом;
- жеңілдетілген санат бойынша конкурсқа қатысу үшін растайтын құжаттар;
- B167 «Ұшу аппараттарын және қозғалтқыштарды ұшырып пайдалану» мамандығы үшін дәрігерлік ұшу-сараптамалық комиссиясының медициналық куәландыруы керек.
Сондай-ақ қосымша ақпарат алу үшін жоғары оқу орындарының қабылдау комиссияларына жүгінуге болады.
Осыған дейін Ғылым және жоғары білім министрі Саясат Нұрбек 2026-2027 оқу жылына 89 457 мемлекеттік грант бөлінгенін айтқан болатын. Оның айтуынша, биыл жоғары білімді кадрларды даярлауға арналған мемлекеттік тапсырыс көлемі алдыңғы оқу жылдарының деңгейінде сақталып отыр.
