Қазақстанда тұрғын үй саясатының жаңа тәсілдері енгізілмек
2021 жылы республикамызда 17,1 млн шаршы метр жаңа тұрғын үй салынған. Бұл 151 мың азаматқа өздерінің тұрғын үй жағдайларын жақсартуға мүмкіндік берді. Бұл туралы Индустрия және инфрақұрылымдық даму министрі Қайырбек Өскенбаев мәлімдеді.
«Тұрғын үй құрылысына салынған инвестиция өткен жылдың тиісті кезеңімен салыстырғанда 19%-ға өсіп, 2,4 трлн теңгені құрады. Биылдан бастап жер ресурстарын тиімді пайдалану, көше-жол желісін дамыту және қоғамдық кеңістіктердің сапасын арттыру есебінен жинақы және алуан түрлі құрылыс салу арқылы «шаршы метр құрылысынан» жайлы өмір сүру ортасын қалыптастыруға көшу жоспарда бар. Азаматтардың тұрғын үй мәселелерін шешудің негізгі тәсілдері субсидия, тұрғын үйді жалға алуға арналған тұрғын үй төлемі, құрылыс салушылардан дайын тұрғын үйді сатып алу, «ескі орамдарды» реновациялау, проблемалық объектілерді аяқтау арқылы мемлекеттік қолдаудың жаңа тетіктері болады. Бүгінгі таңда құрылыс саласында 46 476 кәсіпорын жұмыс істейді, оларда жұмыспен қамтылғандар саны – 641 мың жұмыскер мен маман. Біз жұмыс орындарын сақтау және ұлғайту жөніндегі саясатты одан әрі жалғастырамыз» деді министр.
Тұрғын үй және құрылыс материалдары құнының қымбаттауына жол бермеу үшін министрлік үш бағытта жұмыс жүргізіп жатыр:
- Біріншісі – құрылыс саласын цифрландыру.
- Екіншісі – баға белгілеу жүйесін жетілдіру және құрылыстағы бақылауды күшейту.
- Үшіншісі – құрылыс материалдары өндірісін дамыту.
«Құрылыс саласын цифрландыру бойынша ақпараттық модельдердің мемлекеттік банкі жүйесі енгізіліп жатыр, ол құрылыс объектілерін онлайн форматта, оның ішінде ақпараттық модельдеу технологияларын қолдана отырып модельдеуге мүмкіндік береді» деп баяндады Өскенбаев.
Министрдің айтуынша, саланы цифрландыру бойынша қабылданып жатқан шаралар бюрократияны төмендетеді және құрылыстағы рәсімдерді жеңілдетеді.
«Мемлекеттік және квазимемлекеттік секторлардың инвестицияларының қатысуымен бір ғана объектілердің құнын арттыруды болдырмау үшін мемлекеттік сараптама порталында онлайн-калькулятор енгізе отырып, құрылысқа жұмсалатын шығындардың шекті лимиттері белгіленді» дейді.
Министрдің айтуынша, мемлекеттік бақылауды күшейту үшін мынадай шұғыл шараларды қамтитын заң жобасы әзірленді:
1. Аумақта құрылыс салуды сапасыз жоспарлауды болдырмау мақсатында қала құрылысы сараптамасын енгізу;
2. Құрылыстың барлық кезеңдерінде объектілерге жоспарлы бақылауды енгізу және мемлекеттік сәулет-құрылыс бақылау органдарының объектілерді пайдалануға қабылдауға қатысуы;
3. Пайдаланылатын материалдар мен орындалған жұмыстардың сапасына зертханалық және техникалық тексеру жүргізу үшін тәуелсіз мемлекеттік зертханалық қызметті құру.
«Мемлекет басшысы 2021 жылғы Жолдауында қалаларды кешенді салудың жаңа стандарттарын әзірлеу қажеттілігін атап көрсетті. Осыған байланысты Министрлік қала аумағын сапалы жоспарлау стандарттарының бірінші редакциясын әзірлеп, мемлекеттік органдар мен ұйымдарға келісуге жіберді. Стандарттар тартымды және ыңғайлы қоғамдық кеңістікті қалыптастыруды, жаяу жүргіншілер мен велосипед инфрақұрылымын дамытуды ескере отырып, жинақы құрылысты жобалаудың қарапайым және көрнекі құралы болады. Осы стандарттарды маусым айында бекіту жоспарланған. Аталған стандарттарды ескере отырып, әкімдіктер әртүрлі көздерден қаржыландырылатын тоқсан сайынғы/аудан аралық жоспарларды әзірлеп, бекітіп, инженерлік инфрақұрылымды, тұрғын үй қорын кезең-кезеңімен реконструкциялаудың кешенді тәсілін әзірлеуі қажет. Бүгінгі күні еліміздің ірі елді мекендерінің қалалық инфрақұрылымын дамыту тұжырымдамасының пилоттық жобаларын іске асыруды бастау жоспарланған» деген түсінік берді ведомство басшысы.
