Жеке тұлғалардың банкроттығын рәсімдеуге арналған ақпараттық жүйе құрылды
Еліміздегі Сенаттың жалпы отырысында Қаржы вице-министрі Ержан Біржанов жеке адамдардың банкроттығы рәсімдеріне арналған ақпараттық жүйе құрылғанын айтты. Бұл туралы ҚазАқпарат хабарлады.
![](https://kz.kursiv.media/wp-content/uploads/2023/02/83673c4502e911fc8ccfaff1c61e73212304ac15.jpg)
Ержан Біржановтың айтуынша, қазіргі кезде 1 млн 180 мың адамның қарызы бар. Олардың қарыз сомасы 1 трлн 100 млрд теңгеге жетті. Қарызы бар адамдардың барлығы бірдей банкроттыққа өтініш бермеуі мүмкін.
Сондықтан азаматтардың көбісі «банкрот» санатының кері тұстарын ескеретін болады. Себебі банкрот деп танылған адамдар 5 жыл несие ала алмайды. Сонымен бірге, 7 жылдың ішінде өзін қайтадан банкрот деп тануға жатпайды.
«Жаңа ақпараттық жүйе құрылып, оны мемлекеттік органдардың жүйелеріне қостық. Осы орайда банкроттық рәсімдерін атқаруға қатысты жүйе тиісті сынақтан өтті. Бұл тұрғыда қарызы барлар 2023 жылдың 3 наурызынан бастап банкроттыққа өтініш бере алады. Алдағы уақытта борышкерлер көп тіркелген өңірлерге қызметкерлерімізді бағыттаймыз», – деді Е. Біржанов сенаторлар сұрағына жауап бере отырып.