ҰҚК Ресейдің ФҚҚ-мен бірлесіп қылмыстық топты құрықтады
![](https://kz.kursiv.media/wp-content/uploads/2023/03/shutterstock_2096508544-1024x683.jpg)
Ұлттық қауіпсіздік комитеті, Ішкі істер министрлігі және Ресейдің Федералды Қауіпсіздік қызметімен бірлесіп, қылмыстық топ жетекшілері мен мүшелерін ұстау бойынша арнайы операция жүргізді. Бұл туралы ҰҚК баспасөз қызметінен хабарлады.
«15-16 наурызда ҰҚК-ФҚҚ, сондай-ақ ІІМ және прокуратура қызметкерлері қатарынан мемлекетаралық жедел-тергеу тобы Алматы, Қызылорда және Байқоңыр қалаларында қылмыстық әрекеттің 13 жетекшісі мен белсенді қатысушыларын ұстау бойынша біржолғы арнайы операция жүргізді» делінген хабарламада.
Қазіргі таңда ұсталғандарды сотқа дейінгі тергеп-тексеру басталып, олардың өзге де қылмыстар жасауға қатыстылығы анықталуда.
Комитеттің мәліметінше, жыл басынан бері Ұлттық қауіпсіздік комитеті мен ІІМ Ресейдің ФҚҚ-мен бірлесіп, Байқоңыр қаласы мен Қызылорда облысындағы криминогендік жағдайды сауықтыру бойынша іс-шараларды жүзеге асыруда.
«Бұған дейін хабарланғандай, қаңтар айында екі елдің арнайы және құқық қорғау органдары Қазақстан мен Ресей азаматтары қатысқан қоғамдық қауіпті қылмыстық топтың қызметін тоқтатты. Аталған жұмысты жалғастыра отырып, ҰҚК аса қатыгездікпен ерекшеленетін кезекті ұйымдасқан қылмыстық топты жедел зерделеуге алды. Оның қатысушыларының ауыр жалпы қылмыстарға (кісі ұрлау, бопсалау, ұрлық, кісі өлтіруге оқталу) қатысуы құжатталды», делінген хаюбарламада.