Еңбек нарығының статистикалық деректері АҚШ қор нарығына оң әсер етті

Америка қор индекстеріне бейсенбі күні еңбек нарығына қатысты деректер әсер етті. Standard & Poor’s 500 бір күндегі мәні 26,41 пунктке (0,62%) – 4293,93 тармаққа дейін өсті. MarketWatch сайтының жазуынша, S&P 500 өткен жылдың қазан айының ортасындағы ең төменгі деңгейінен 20% жоғары, бұл аю нарығының аяқталғанын білдіреді.

Ал Nasdaq Composite индексі 133,63 пункт (1,02%) қосып, сессияны шамамен 13238,52 тармақта аяқтады.

Бейсенбіде Dow Jones Industrial Average 168,59 пунктке (0,5%) көтеріліп, 33 833,61 тармақты құрады. Индекске кіретін компаниялар арасында Boeing Co акциялары көш бастап, 2,9% өсім көрсетті. Salesforce Inc.– 1,85%-ға, сондай-ақ Intel Corp. мен UnitedHealth Group. 1,7%-ға өсті.

АҚШ Еңбек департаментінің мәліметінше, алғаш рет жұмыссыздық бойынша жәрдемақы алуға өтініш білдірген америкалықтардың саны өткен аптада 28,000-ға өсіп, 261,000-ға жеткен. Көрсеткіш 2021 жылдың қазан айынан бері ең жоғары деңгейде.

Статистика жарияланғаннан кейін, ФРЖ келесі аптадағы отырысында пайыздық мөлшерлемені 25 базистік тармаққа көтереді деп күтетін трейдерлердің үлесі 32%-дан 28%-ға дейін төмендеді.

Spartan Capital Securities бас экономисі Питер Кардилло «S&P 500 «аю нарығынан шығаратын» сиқырлы көрсеткішке қол жеткізді. ФРЖ келесі аптада мөлшерлемелерді көтермейді деп үміттенемін», деп атап өтті.

Carvana Co. акцияларының бағасы автодилер екінші тоқсанға жақсы пайда түседі деген болжамынан соң бір жарым есе (56%-ға жоғары) өсті.

Autoliv 0,5%-ға көтерілді. Көлік құралдары қауіпсіздік жүйелерін шығаратын швед-америкалық өндіруші шығынды азайту шаралары аясында өзінің жаһандық жұмыс күшін 8000-ға қысқартуды жоспарлап отырғанын хабарлады.

Электр көлік өндірушісі Tesla 4,6%-ға өсті. Осылайша, өсім 2021 жылдың қаңтарынан бері болмаған оныншы сессия қатарынан жалғасты.

Cactus Inc. капитализациясы 8,2 пайыз қосты. Бұрғылауда қолданылатын қысымды бақылау жабдығын өндіруші 150 миллион долларға сатып алу бағдарламасын жариялады.

Сонымен қатар, GameStop компаниясының акциялары бас атқарушы Мэтью Фурлонгтың отставкаға кеткенін жариялағаннан кейін шамамен 18% құлдырады.

Signet Jewelers 10,7%-ға арзандады. Солтүстік Америка мен Ұлыбританиядағы ең ірі зергерлік дүкендер желісінің бірінің иесі 2024 жылдың қаңтарында аяқталатын қаржы жылына арналған кіріс пен табыс болжамын төмендетті.

KASE индексі 0,08%-ға өсіп, 3 545,29 тармақты құрады. Акциялары қор индексіне енгізілген алты компания бағалы қағаздарының саудасы оң мәнде аяқталды.

Лондон қор биржасында Kaspi акцияларының құны 2,2%-ға, $80,3-ке дейін, Халық банкінің ЖДҚ құны – 0,3%-ға, $12,68-ге дейін арзандады. Ал Қазатомөнеркәсіптің бағалы қағаздары керісінше, 1,65% өсіп, 27,65 долларға жетті.