1 қыркүйектен бастап 1-4 сынып оқушыларына толықтай тегін тамақ беріледі

Биыл 1 қыркүйектен бастап 1-4 сынып оқушылары толықтай тегін тамақпен қамтамасыз етіледі. Халықтың әлеуметтік осал топтарына жататын 98 мың балаға тегін ыстық тамақ берілетін болады. Бұл туралы Президент қабылдауында болған Оқу-ағарту министрі Ғани Бейсембаев мәлімдеді.

Сонымен қатар, кездесуде мектепке дейінгі, орта, техникалық және кәсіптік білім беру салаларын дамыту үшін қабылданып жатқан шаралар жөнінде мәлімет берілді.

Білім беру ұйымдарын дабыл түймелерімен, лицензиясы бар күзетпен, турникеттермен және жедел басқару орталықтарына қосылған бейнебақылау жүйелерімен жабдықтау жоспарланып отыр.

Оқу-ағарту министрінің дерегінше, қыркүйек айынан бастап мектепке дейінгі білім беру мекемелеріндегі педагогтардың еңбекақысы 30 пайызға өседі, ал, жыл соңына дейін балабақшаларда 81 мың орын ашу жоспарланып отыр.

Сонымен қатар, педагогтарды аттестаттау рәсімі жетілдіріліп жатыр. Енді олардың кәсіби біліктілігі пәнді қаншалықты жақсы білетініне қарай, ал жұмысының нәтижесі білім алушылардың оқу жетістіктері негізінде бағаланады;

Ақпаратқа сәйкес, биыл техникалық және кәсіптік білім алушы студенттердің 80 пайызы тегін оқитын болады. Қыркүйек айынан бастап олардың шәкіртақысы 50 пайызға, ал келесі жылы 100 пайызға артады. Кәсіпорындар колледж түлектерін міндетті түрде жұмысқа орналастыру шартымен мамандарды мақсатты даярлау ісіне алғаш рет атсалысып отыр.

Кездесу соңында Президент Қасым-Жомарт Тоқаев Оқу-ағарту министріне білім беру жүйесін одан әрі жетілдіру және балалардың қауіпсіздігін қамтамасыз ету ісіне ұдайы көңіл бөлуді тапсырды.