Қазақстан журналистері – азаматтық ұстанымы берік патриоттар – Тоқаев
![курбан айт](https://kz.kursiv.media/wp-content/uploads/2023/06/tokaev-2-1024x576.jpg)
Президент бұқаралық ақпарат құралдары қызметкерлерін кәсіби мерекесімен құттықтады.
«Сіздерді кәсіби мерекелеріңізбен шын жүректен құттықтаймын! Әділетті Қазақстанды құру үшін қоғамда құндылықтар жүйесін жаңғыртып, ұлттың жаңа сапасын қалыптастырудың мән-мағынасы зор. Бұл бағытта еңбекқорлық пен білімпаздықты, адал азаматқа тән қасиеттерді дәріптейтін масс-медиа өкілдері айрықша рөл атқарады», деді Перзидент
Қасым-Жомарт Тоқаев бұқаралық ақпарат құралдары азаматтық диалог жүргізудің ашық алаңына айналғанын атап өтті. Мемлекет пен қоғамның өзара байланысын нығайтуға зор үлес қосып жүрген ел журналистері озық ой мен тың идеялардың таралуына дәнекер болып, азаматтарды толғандыратын өзекті мәселелерді көтеріп жүргенін атап өтті.
Сондай-ақ оқиғаларды жан-жақты зерделеп, популизм мен арандатушылыққа тосқауыл бола білетін журналистердің жұмысын – айрықша маңызды миссия деп бағалады.
«Отандық медиа саласы қаламы жүйрік, ойы ұшқыр тілшілер қауымының кәсіби біліктілігі мен күнделікті тынымсыз еңбегінің арқасында дамып келеді. Қазақстан журналистері – өз ісінің хас шеберлері ғана емес, азаматтық ұстанымы берік патриоттар. Осындай жауапты қызметте әрдайым абырой биігінен көріне беріңіздер! Баршаңызға зор денсаулық, бақ-береке және шығармашылық табыс тілеймін!», деді Мемлекет басшысы.
Мемлекет басшысы қазақстандықтарды журналистердің кәсіби мерекесімен тұспа-тұс келген Құрбан айтпен құттықтады.