Өзбекстанда МИ-8 тікұшағы апатқа ұшырады

Фото: kursiv.media

Өзбекстанның Самарқанд облысындағы Қаттақорған полигонда МИ-8 әскери тікұшағы апатқа ұшырап, экипаж мүшелері түгел қаза тапты. Тікұшақ елдің Қорғаныс министрлігіне тиесілі болған. Бұл туралы Өзбекстан Қорғаныс министрлігі хабарларды.

«Бүгін сағат 20:15-те Қаттақорған полигонында оқу-жаттығу кезінде Әуе қорғанысы және әуе күштері қолбасшылығына тиесілі Ми-8 тікұшағы апатқа ұшырады, қайғылы оқиға салдарынан тікұшақ экипаж қаза тапты», – делінген хабарламада.

Қазіргі кезде оқиға орнында апат себептерін анықтайтын арнайы комиссия жұмыс істеп жатқаны хабарланды.

«Каттақорған» – Өзбекстандағы 2019 жылдың қарашасында ашылған ең ірі әскери полигон.

Қазақстанда да 2023 жылдың ақпанында МИ-8 тікұшағы апатқа ұшыған еді. Орал қаласынан 54 шақырым жерде Қазавиақұтқару тікұшағы қонуға мәжбүр болып, 4 адам қайтыс болған.

Осы апаттан соң, Қазақстанның авиациялық әкімшілігі Ми-8 типті тікұшағын пайдаланатын әуе компанияларының қызметіне жоспардан тыс тексеру жүргізетінін хабарлаған.