ТЖД Алматы облысы тауларында қар көшкіні қаупі сақталып отырғанын ескертеді
Алматы облысының тауларында қар көшкіні қаупі бар. Осыған орай Төтенше жағдайлар департаменті таулы жерлерде қауіпсіздік шараларын сақтауды сұрайды.
«28 наурыз бен 31 наурыз аралығында Алматы облысының тауларында қар көшкіні қаупі сақталады. ТЖД азаматтардан, туристерден және демалушылардан қар көшкінін тудыруы мүмкін болғандықтан қарлы беткейлерге шықпауды, сондай-ақ таулы жерлерде барлық қауіпсіздік пен мінез-құлық шараларын сақтауды сұрайды», – деп жазылған таратылған хабарламада.
Көшкін қаупі 55 учаскеде болуы мүмкін. Оның ішінде Іле-Алатау тауларының оңтүстік беткейінде Еңбекшіқазақ, Талғар және Қарасай аудандары аталған.
Осыдан бірнеше күн бұрын Алматыдағы «Pioneer» тау шаңғы курортының маңында қар көшкіні жүрді. Қар көшкінінің видеосы әлеуметтік желіде пайда болды.
Төтенше жағдайлар министрлігінің мәліметінше, 22 наурыз күні таңертең жылымықтың әсерінен, сондай-ақ жауын шашынға байланысты Қотырбұлақ өзенінің бассейнінде қар көшкіні еріп, қар массасы «Pioneer» тау шаңғысы курортының құрылысына дейін жеткен. Зардап шеккендер болмаған.
Ақпан айында Еңбекшіқазақ ауданында қар көшкіні жүріп «Түрген ауылы – Батан» автожолын бөгеп қалған болатын.
«Қар жамылғысының тұрақсыз жағдайына байланысты таулардың баурайында жалпы көлемі 52,5 текше метр қар көшкіні өздігінен түсті», – делінген хабарламада.
«Қазселденқорғау» күштері автожолды тазарту жұмыстарын жүргізген. Зардап шеккендер мен қираулар болған жоқ.
«Азаматтардың қауіпсіздігі және автокөліктің жол қозғалысы мақсатында жолдың осы учаскесі бойынша жол 2024 жылғы 1 мамырға дейін Есік қ.- Есік көлі және Түрген автожолының 15 километрінен 41 километріне және Түрген ауылы-Батан-Асы обсерваториясы автожолының 20 шақырымынан 41 шақырымына дейін жабылды», –делінген хабарламада.
Сондай-ақ Алматының Медеу ауданындағы Тау-самалы ықшам ауданында көшкін жүрді. Лай топырақ жеке меншік екі үйді басып қалған еді.
