BMW акциялары тоқсандық есеп жарияланғаннан кейін, үш айдағы ең төменгі деңгейге дейін түсті
![](https://kz.kursiv.media/wp-content/uploads/2024/05/2024-05-08-11.35.56-1024x671.jpg)
BMW бірінші тоқсанда кіріс пен табыстылығы төмендегені жайлы хабарлады. Үнемі өсіп келе жатқан шығындар компанияның кірісіне салмақ түсіруде. Есептілік жарияланғаннан кейін Германиядағы саудада BMW акциялары соңғы үш айдағы ең төменгі деңгейге түсті. Қазіргі уақытта олардың құны 98,56 еуроға жетті – бұл алдыңғы күннің жабылу бағасынан 5,7% төмен.
Компания есебі
— BMW 2024 жылдың бірінші тоқсанындағы кірісі 0,6 пайызға өсіп, 36,6 миллиард еуроға (39,3 миллиард доллар) жеткенін хабарлады.
— Бірінші тоқсанда салықты төлегенге дейінгі пайда 4,16 млрд еуро болды. Бұл өткен жылдың сәйкес кезеңімен салыстырғанда 19%-ға аз. Бірақ сарапшылар күткеннен көп: олардың болжамы 3,9 млрд еуро болды, деп жазады Reuters. BMW пайданың төмендеуін өндіріс шығындарының өсуімен түсіндіреді.
— Компанияның операциялық табыстылығы 2023 жылдың бірінші тоқсанындағы 12,1%-бен салыстырғанда 8,8%-ға дейін төмендеді. Бұл сарапшылардың бағалауынан төмен, олар 10,2% болжады, деп жазады Market Screener.
— Бірінші тоқсанның қорытындысы бойынша топтың көліктерінің жалпы сатылымы 1,1%-ға өсті. Бұл ретте Еуропадағы сатылымдар 10%-ға өсті. Ал компания үшін негізгі нарық – Қытайда премиум сегменттегі сату көлемінің төмендеуіне байланысты сатылым 4,1%-ға төмендеді, деп жазады Bloomberg.
Ары қарай не болады
Reuters BMW 2024 жылы зерттеу, әзірлеу, өндіріс пен және персоналға шығындардың өсуіне, сондай-ақ бұрын жүрілген көліктер бағасының төмендеуіне байланысты салық салғанға дейінгі кіріс аздап төмендейтінін күтеді деп жазды.
Автоөндіруші электрлі көліктерге және өзінің барлық желісі бойынша модельдерді модернизациялауға үлкен инвестиция құйып жатыр және жыл соңында рекордтық шығындар күтеді (2023 жылы олар 7,5 миллиард еуроны құрады), деп атап өтті агенттік.
Нарықтағы жағдай
Жылдың алғашқы үш айында BMW, MINI және Rolls-Royce брендтерінен шамамен 83 000 электрлі көлігін жеткізді. Бұл 28%-ға өсті деген сөз. Сонымен қатар өсім Tesla, Volkswagen, Mercedes және Audi сияқты бәсекелестердің электромобильдеріне сұраныстың төмендеуі аясында болды.
BMW нәтижелері инфляция, Қытайдың ұзақ уақытқа созылған экономикалық қалпына келуі және Еуропаның көп бөлігіндегі экономикалық өсудің баяулауына байланысты автокөлік нарығындағы жағдай биыл күрделі болуы мүмкін екенін көрсетеді, деп жазады Bloomberg.
BMW акцияларын не істеу керек
12 ай ішінде BMW акциялары 8% құнын жоғалтты. Сарапшылардың көпшілігі автоөндіруші акцияларын ұстауды ұсынады. Жеті сарапшы акцияларды сатып алуға, төртеуі сатуға кеңес береді. Акциялардың орташа мақсатты бағасы – 112,9 еуро, сауданың соңғы жабылу бағасынан 8,3%-ға жоғары.