Бектенов әкімдерге KPI бекітті: басшылардың жұмысы халықтың әл-ауқатымен бағаланатын болады
Премьер-министр Олжас Бектенов қазақстандықтардың әл-ауқатын жақсарту нәтижесін тексеру арқылы әкімдер жұмысының тиімділігіне мониторинг жүргізуді тапсырды деп хабарлайды Үкімет баспасөз қызметі.
«Үкімет басшысы тұрғындардың әл-ауқатын жақсарту критерийі бойынша әкімдердің нақты жұмысына KPI енгізуді тапсырды», – делінген хабарламада.
Тексеру жүргізу үшін «Отбасының цифрлық картасы» платформасы пайдаланылатын болады. Бағдарламада қазақстандық отбасылардың қаншалықты жақсы өмір сүре бастағаны талданады. Төтенше және дағдарыс деңгейіндегі қазақстандықтардың әл-ауқаты жақсарғанға дейін бес санат болады.
Бектенов әкімдерге бұл құралды орта және ұзақмерзімді шараларды жоспарлау және іске асыру үшін нұсқаулық ретінде пайдалануды тапсырды.
Оның айтуынша, әкімдік мұқтаж отбасылардың қиын жағдайға түсуіне жол бермеу үшін, сондай-ақ кедейлікті, жұмыссыздықты, халықтың көлеңкелі жұмыспен қамтылуын азайту үшін жұмыс істеуі керек.
«Әкімдердің адамдардың әл-ауқатын жақсартуға қосқан үлесін нақты бағалау критерийіне көшеміз. Индикаторлардың орындалу мониторингі тұрақты болады. Біз онлайн режимінде динамиканы көріп, қорытынды жасаймыз», — деп атап өтті Олжас Бектенов.
Мамырдың басында премьер-министр Олжас Бектенов Өнеркәсіп министрлігі мен өңір әкімдеріне су тасқынынан келген шығынды бағалау жұмыстарын осы апта соңына дейін аяқтауды тапсырған. Үкімет басшысы бұл бағыттағы жұмыстар кейбір өңірде баяу жүріп жатқанын айтып, ескерту жасаған.
Отбасының цифрлық картасы – мемлекеттік кепілдіктер бойынша дербестендірілген отбасының базасы. Ол 2022 жылы іске қосылған. Әрбір отбасының құрамы мен әл-ауқат деңгейіне қарай мемлекеттік кепілдік түрлерін алу құқығын жүзеге асыруға мүмкіндік береді.
