Грант куәлігін қайдан алып, қайда бару керек?
Грант куәлігін алған талапкерлер 25 тамызға дейін оқуға түсу үшін Жоғарғы оқу орнына құжаттар тапсыру қажет. Бұл туралы Ғылым және жоғары білім министрлігінің хабарламасында жазылған.
Куәлікті grant.testcenter.kz сайтынан жүктеп алу керек. Ары қарай талапкерлер 25 тамызға дейін грант немесе ақылы негізде оқуға түсу үшін жоғарғы оқу орнына құжаттар тапсыру керек.
Қабылдау комиссиясына бірқатар құжаттарды ұсыну қажет:
- Жеке куәлік;
- 3х4 көлеміндегі фото;
- Орта білім туралы аттестат немесе техникалық және кәсіптік білім беру (ТжКБ) ұйымдарының түлектері үшін диплом;
- № 075/у нысанындағы медициналық анықтама;
- Ер балалар үшін әскери тіркелу куәлігі;
- Білім грантын тағайындау туралы электронды куәлік (болған жағдайда),
- Жеңілдетілген санат бойынша растайтын құжаттар (болған жағдайда).
3 тамызда қазақстандық абитуриенттер үшін жоғарғы оқу орындарына арналған мемлекеттік гранттар тізімі жария болған.
Жоғары білімнің білім беру бағдарламалары бойынша оқу үшін барлығы 78 219 грант бөлінді. Оның ішінде Қазақстан Республикасының Үкіметі айқындаған өңірлерге қоныс аударатын ауыл жастары қатарынан Қазақстан Республикасының азаматтарын оқытуға 3903 грант бөлінді.
