Суға батқан Bayesian кемесінен британдық магнат Майк Линч пен қызының мәйіті табылды
Британдық мультимиллионер Майк Линч пен оның 18 жасар қызы Ханна Сицилия жағалауында Bayesian кемесімен бірге суға батып кеткен. Telegraph басылымының хабарлауынша, мультимиллионер мен оның қызының мәйіті 49 метр тереңдікте жатқан суперяхтадан су бетіне шығарылған.
Әкесі мен қызы кеме суға кеткенде бір кабинада болған. Яхтада 22 адам болған. Оның 15-ін жақын маңнан өтіп бара жатқан кеме құтқарып қалған. Құтқарылғандардың қатарында Линчтің әйелі Анджела Бакарес бар.
Сицилия азаматтық қорғау комитетінің басшысы Сальво Кочина сүңгірулердің бұдан бөлек тағы екі адамның мәйітін тапқанын айтқан.
Айта кетейік, Bayesian яхтасы 19 тамыздағы дауылдан кейін Сицилияның Палермо жағалауында суға батқан. Сол күні кемеде болған миллионер Майкл Линч пен оның қызы Ханнаның із-түссіз жоғалып кеткен туралы хабарланды. Сүңгуірлер жоғалып кеткен 7 адамды іздестіре бастады. Артынша кеме аспазы Рекальдо Томастың денесі табылған.
Сонымен бірге 20 тамыз күні яхта апатында әлемдегі ең ірі инвестициялық банктердің бірі – Morgan Stanley International директорлар кеңесінің төрағасы Джонатан Блумер мен оның әйелі Джуди Блумер және Clifford Chance заңгері Крис Морвилло мен оның әйелі Неда Морвилло із-түзсіз жоғалып кеткені хабарланды.
Майк Линч бірнеше табысты технологиялық компаниялар құрған. Оны «британдық Билл Гейтс» деп атайтын. 1991 жылы ол саусақ дактилоскопиялық технологиясын әзірлеп шығарған. Ол бірінші Cambridge Neurodynamics фирмасын құрған. Ал бес жылдан кейін Линч үлкен көлемдегі деректерді талдауға арналған құралдарды әзірлейтін Autonomy компаниясын құрған.
