Жаһандық нарықтардағы құбылмалылық аясында инвесторлар ETF биткоиндарынан 1,2 млрд долларды шығарып алды
Биткоинге ақша салатын АҚШ-тың биржалық инвестициялық қорлары 1,2 млрд доллар жоғалтты. Инвесторлар сегіз күн қатарынан биткоинге салған қаражатын шығарып алып жатыр. Әлемдік қор нарықтарындағы дабыл цифрлық активтерді де айналып өтпеді деп түсіндірді сарапшылар.
Толығырақ
Споттық ETF биткоиндары АҚШ-тағы сауда-саттық аясында жыл басынан бері күнделікті таза жылыстаудың ең ұзақ кезеңін бастан өткерді. Bloomberg мәліметтері бойынша, инвесторлар 28 тамыздан 6 қыркүйекке дейінгі сегіз күн ішінде 12 ETF-тен шамамен 1,2 млрд долларды шығарып алған. Қорларды капиталдандырудың төмендеуі экономикалық өсімге деген алаңдаушылыққа байланысты орын алып отыр. Бұл акциялар мен тауарлар үшін қиын кезең саналады. ETF биткоиндарынан қаражатты шығарып алу әлемдік нарықтар үшін қиын кезеңде тәуекелді активтерден шегінудің бір бөлігі екенін ұмытпайық деп жазды Bloomberg. АҚШ-тағы жұмыспен қамту және Қытайдағы дефляциялық қысым туралы даулы мәліметтер де трейдерлерге теріс әсер етеді, дейді агенттік. Белгісіздік криптовалюта нарығында да байқалып отыр. Мұндағы өзгеріс акциялардың қозғалыстарымен көбірек байланысты.
Пікірталас қарсаңында тәуекелдерді хеджирлеу
Биткоин қыркүйек айында шамамен 7%-ға арзандады деп жазды Bloomberg. Сонымен қатар ең ірі цифрлық актив демалыс күндері сәл ғана өсім көрсетті және Сингапурда дүйсенбі – 9 қыркүйек, сағат 13:00-дегі жағдай бойынша шамамен 1%-ға – 54,9 мың долларға дейін өсті.
«Тіркелген сәл ғана өсім кейбір танымал трейдерлердің қысқа позицияларын жабуымен байланысты болуы мүмкін», – дейді Arbelos Markets компаниясының сауда директоры Шон Макналти. Оның айтуынша, бұл жағдай АҚШ президенттігіне кандидат Дональд Трамптың сауалнамалар мен болжау нарықтарындағы позициясын жақсартуда маңызды рөл атқаруы да мүмкін. Ол Трамп пен демократтар ұсынған кандидат – вице-президент Камала Харрис арасындағы алдағы пікірталас нарықтардағы құбылмалылықты тудырған жағдайда хеджирлеу опцияларына сұраныс артатынын атап өтті.
Orbit Markets компаниясының негізін қалаушы Каролин Моронның пікірінше, биткоин сәрсенбіде АҚШ-та тұтыну бағалары бойынша деректер жарияланғанға дейін 53-57 мың доллар аралығында саудаланады.
Түпнұсқа криптовалютаға тікелей инвестиция салатын биткоинге арналған америкалық ETF-тер қаңтар айында үлкен толқумен дебют жасады. Бұл қорларға күтпеген жерден жоғары сұраныс наурыз айында бағамды 73,8 мың долларға дейін көтеруге көмектесті. Алайда уақыт өте келе қаражат ағыны баяулады. Жыл басындағы жағдаймен салыстырғанда криптовалюта шамамен 30%-ға арзан тұрады
