ФРЖ мөлшерлемесі төмендегеннен кейін, шағын компаниялардың кірісі артады – BofA
Капиталдандырылуы шағын компаниялар Федералды резервтік жүйенің (ФРЖ) мөлшерлемесі 50 базистік тармаққа төмендегеннен кейін орташа есеппен ірі компаниялардан асып түседі деп хабарлады Bank of America. Ал ФРЖ өткен аптада пайыздық мөлшерлемені 2020 жылдан бері алғаш рет төмендетті.
Толығырақ
Тарих көрсеткендей, капиталдандырылуы шағын компаниялар (small-caps) әдетте ФРЖ мөлшерлемені 50 базистік тармаққа төмендеткеннен кейінгі жарты жылда орташа есеппен капиталдандырылуы ірі компаниялардан 1 пайыздық тармаққа жоғары кірістілік көрсетеді, ал 12 ай ішінде шамамен 3 пайыздық тармаққа озады, деп жазды Bank of America-ның шағын және орта капиталдандырылған компаниялар бойынша бас стратегі Джилл Кэри Холл. Оның есептеулері Barron’s басылымында жарияланған.
ФРЖ 18 қыркүйекте мөлшерлемені 50 базистік тармаққа төмендетіп, 2020 жылдан бері алғаш рет ақша-несие саясатын жұмсартты. Бұл төмендету қор нарығындағы раллиге себепкер болды. Капиталдандырылуы шағын компаниялар үшін Russell 2000 индексі осы уақыт аралығында 1%-ға өсті, ал ірі компаниялар үшін S&P 500 индексі 1,2%-ға артты.
Контекст
Экономикалық өсудің баяулауы және мөлшерлеменің төмендеуін күткен инвесторлар жазда капиталды қайта бағыттай бастады: кейбір қаражаттарын ірі технологиялық компаниялардың акцияларынан капиталдандырылуы шағын компаниялардың акцияларына ауыстырды. Нәтижесінде, шілде айында Russell 2000 индексі мен ірі технологиялық компаниялардың Nasdaq Composite индексі арасындағы кірістілік айырмашылығы 2001 жылдан бері ең жоғары деңгейге жақындады.
Инвесторлардың логикасы қарапайым: қарыз алу құнының төмендеуі капиталдандырылуы шағын компаниялардың құнының өсуіне әкелуі керек деп жазды Barron’s. Джилл Кэри Холлдың айтуынша, Russell 2000 индексіндегі қаржы секторына жатпайтын компаниялардың шамамен 40%-ы өзгермелі пайыздық мөлшерлеме бойынша қарыз алады. Яғни, ФРЖ мөлшерлемесі төмендегенде, олардың несие бойынша төлемдері де азаяды. Салыстырмалы түрде, S&P 500 құрамындағы компаниялардың көп бөлігі тұрақты пайыздық мөлшерлеме бойынша қарыз алады.
Barron’s-тың мәліметінше, аналитиктер капиталдандырылуы шағын компаниялардың қарыз төлемдерін азайту арқылы шығындарын төмендетіп, акцияларының бағасының өсуіне ықпал ететінін болжап, олардың бағалауларын арттыруы мүмкін.
«Шағын компаниялардың дисконтпен бағаланатынын, [потенциалды] кірістің өсуін және олардың акцияларының циклділігін ескере отырып, ФРЖ мөлшерлемесінің төмендеуі инвесторларды капиталдандырылуы шағын компанияларға тартатын катализатор болуы мүмкін», – деп мәлімдеді MarketWatch-қа Bernstein Private Wealth Management-тің аға инвестициялық аналитигі Мэтт Палаццоло. Lazard компаниясындағы small-caps бағытын бақылайтын Шон Галлахер өз кезегінде капиталдандырылуы шағын компаниялардың акциялары алдағы 6-12 ай ішінде 30-50%-ға өсуі мүмкін екенін атап өтті.
