Қытай шетелге облигация шығармақ

АҚШ-та порт жұмысшылары ереуілге шықты. Осының салдарынан тауар жеткізу тізбегі бұзылды. Бұл негізгі тұтыну тауарларының бағасын қымбаттатты. Осылайша, қор нарығы күтпеген жерден макроэкономикалық статистиканы бұзып алды. Ал Жапония банкі елдегі қарыз алу құнын арттыруға асықпайтынын мәлімдеді.

Жапония банкінің басшысы мөлшерлемелерді аса сақтықпен көтеруге шақырды

Жапония банкі директорлар кеңесінің төрағасы Асахи Ногучи қаржылық реттеуші пайыздық мөлшерлемелерді одан әрі арттыру мүмкіндігіне ие екенін мәлімдеді Алайда бұл шараны абайлап, асықпай қабылдау қажет. Осы арқылы шенеунік инвесторларға банктің елдегі қарыз алу құнын көтеруге асықпайтынын ұқтырғандай болды.

Шілде айында иеннің күрт құлдырауынан кейінгі баға өсімі инфляциялық қысымды жұмсартқаны белгілі. Бұл Жапония банкіне шешім қабылдауда экономикалық тәуекелдерді мұқият талдауға уақыт берді.

«Егер экономика мен бағаның даму бағыты болжамдарымызға сәйкес келсе, біз монетарлық қолдаудың деңгейін реттейміз. Бірақ бұл өте баяу қарқынмен жүзеге асады», – дейді Ногучи.

Трейдерлер Жапониядан келген сигналдарға ерекше назар аударып отыр. Себебі тамыз айының басында қор нарықтарының қомақты құлдырауы дәл осы елден басталған еді.

АҚШ-та өндірістік тапсырыс төмендесе де, қызмет көрсету саласының белсенділігі өсіп келеді

Reuters-тің мәліметінше, аптаның соңында қор нарығы АҚШ-тың жаңа статистикасын қабылдады. Тамыз айында өндірістік тапсырыстар ай сайын 0,2%-ға төмендеген. Мұны АҚШ Сауда министрлігінің есебінен көруге болады.

Атап айтқанда, негізгі капитал тауарларының жеткізілімі (-0,1%), сондай-ақ қорғаныс секторына қатысы жоқ тауарларға тапсырыстар (-1,3%) азайған. Соған қарамастан АҚШ-та қызмет көрсету саласының белсенділігі төмендеудің орнына, керісінше өсіп келеді. Көрсеткіш екі жыл ішіндегі ең жоғары деңгейге жетті.

Өндірістік емес сектордағы сатып алу менеджерлерінің индексі (PMI) өткен айда 54,9-ға дейін жеделдеген. Бұл – 2023 жылдың ақпан айынан бергі ең жоғары деңгей. Тамыз айында индекс 51,5 болған еді.

АҚШ порттарындағы ереуіл жүк жөнелтушілерді дүрбелеңге түсірді

АҚШ-тың Шығыс жағалауы мен Мексика шығанағындағы порттардағы ереуілдің жалғасып жатқанына бірнеше күн болды. Жеткізу тізбектеріндегі шиеленіс күшейді деп хабарлады CNBC.

Теңіздегі тасымалдаушы компанияларға берілетін үстемеақылар мен логистикалық шығындар арта бастады. Бұл жағдай АҚШ экономикасына әсер етуі мүмкін. Әрі жүк жөнелтушілерді де алаңдатады. Қауіптің күшейгеніне қарамастан, екі тарап – Халықаралық порт жүк тасушылары қауымдастығы мен АҚШ Теңіз альянсы әлі де келіссөздерге отырмаған.

Енді негізгі тауарлардың кейбірі жақын арада қолжетімсіз болады да, басқаларының бағасы айтарлықтай өседі. Жеткізу тізбегіндегі тәуекелдерді басқару жөніндегі Exiger компаниясының бас директоры Брэндон Дэниелстің айтуынша, денсаулық сақтау саласы ереуіл мен Таяу Шығыстағы әскери әрекеттерден зардап шегуде.

«Көптеген маңызды дәрі-дәрмек Израильде шығарылады. Бірақ соғыс салдарынан өндіріс баяулады. Сонымен қатар медициналық құралдар мен дәрі-дәрмектер жүктің түсірілуін күтіп тұрған кемелерде тұрып қалды», – деді ол.

Ереуілдің АҚШ экономикасына тигізген күнделікті зияны 500 мың доллардан 2 млрд долларға дейін бағаланып отыр.

Қытайлық компаниялар шетелге облигациялар шығарып, 15 млрд доллар тартуды жоспарлап отыр

Қытайлық инвестициялық деңгейдегі компаниялар осы тоқсанда шетелдік облигацияларды орналастыру арқылы миллиардтаған доллар тартуды жоспарлап отыр. Бұл туралы Asia Finance хабарлады. Қаржылық кеңесшілердің мәліметінше, сомасы 10-15 млрд долларды құрауы мүмкін.

Үкіметтің қаржыландыруды арзандатуы компаниялардың қарыз алуға деген қызығушылығын арттырды. Өткен аптада ғана олар доллар мен еуродағы 5,9 млрд облигация шығарды.

«Ынталандыру шараларының оң импульсі мен FOMC мөлшерлемесін төмендетудің күтілуі эмитенттердің икемді болып, нарыққа тезірек шығуына ықпал етуі мүмкін», – деді Citigroup облигациялар бөлімінің басшысы Сикси Сун.

Айта кетейік, кейінгі екі аптада Қытай экономиканың дағдарысқа ұшыраған жылжымайтын мүлік секторын жандандыру мақсатында несие мен ипотекалық несиелер бойынша пайыздық мөлшерлемелерді төмендетті. Сондай-ақ Бейжің биыл шамамен 2 трлн юаньға (285 млрд доллар) облигациялар шығарып, үй шаруашылықтарын ынталандыруды жоспарлап отыр.