Медициналық мекемелерде несие берешегінің артуына не себеп?
Денсаулық сақтау министрлігі 10 аймақтағы 24 медициналық мекеменің несие берешегінің себебін іздеген. Бұл туралы министрліктің kursiv.media ресми сауалына берген жауабында жазылған.
Министрлік негізгі үш себепті анықтаған.
- Біріншіден, медициналық ұйымдардың басшыларының шешімдері қате болуы немесе менеджмент деңгейінің төмен болуы. Яғни басшылық медициналық қызмет көрсету стандарттарын бұзып, жөндеу жұмыстарын жүргізіп, несие берешегі бола тұра үстемақы таратып отырған.
- Екіншіден, медициналық аппараттар мен дәрі-дәрмектер сатып алу кезінде сараптама жүргізілмеген.
- Үшіншіден, инфляция деңгейіне байланысты тариф индекстелмеген.
Министрлік ақпаратына сүйенсек, 2024 жылдың 20 қыркүйегіне дейін елдегі 20 жедел жәрдем қызметінің 1 млрд теңге несие берешегі бар.
Дегенмен бұл осы салаға бөлінген жылдық бюджетпен салыстырғанда, әлдеқайда аз сома болып көрінеді. Науқастарды тасымалдау, яғни жедел жәрдем қызметіне 2022 жылы – 76,8 млрд теңге, 2023 жылы – 102,67 млрд теңге, 2024 году – 112,5 млрд теңге бөлінген.
Жалпы медицинаға кеткен шығын 2024 жылдың өзінде 2,8 трлн теңгеге жеткен. Оның 20%-ы – стационарлық көмекке, 19% – алғашқы жедел жәрдем көмегіне, 15% – консультативті-диагностикаға, 9%-ы – амбулаторлық дәрі-дәрмекке, басқа бөлігі өзге де шығындарға жұмсалған.
Жыл соңына дейін медицина шығындарына әлі 63,6 млрд теңге қажет. Оның ішінде жедел жәрдемге – 9,6 млрд теңге, алғашқы көмек көрсетуге – 23,3 млрд теңге, гемодиализге – 4,1 млрд теңге, ЖМК – 7,8 млрд теңге, ЖТМК – 1,5 млрд теңге, инфекциядан қорғануға – 3,9 млрд теңге, онкогематологияға – 3,5 млрд теңге, амбулаторлық көмекке – 4 млрд теңге, тарифтерді көбейтуге – 5,4 млрд теңге, сот атқару құжаттарына – 0,5 млрд теңге қажет.
Осыған дейін 2023 жылдың қорытындысы бойынша елдегі 423 медициналық мекеменің несие берешегі 82,3 млрд теңгені құрағанын жазған едік.
