Биткоин бағасы 68 мың доллардан асты
16 қазан күні биткоинның бағасы 2023 жылдың шілдесінен бергі ең жоғары көрсеткішке жетіп, 68 400 доллар деңгейіне жақындады. Бұл криптовалюта нарығындағы негізгі ойыншылардың бағасын да арттырды. Мысалы, Coinbase компаниясының акциялары 7%-дан астам өсім көрсетті. Кейбір сарапшылар бұл өсімді Дональд Трамптың Ақ үйге қайта оралу ықтималдығының артуымен байланыстырады.
CoinMarketCap онлайн-биржасының мәліметінше, биткоин бағамы 16 қазан күні 68 375,29 долларға дейін көтерілді. CNBC арнасы бұл көрсеткіштің шілдеден бергі ең жоғарғы деңгей екенін атап өтті. Соңғы жеті күн ішінде биткойн 9%-ға қымбаттаса, капитализациясы бойынша екінші орындағы Ethereum шамамен 7%-ға өсті.
Биткоинның өсуі криптовалютаға байланысты компаниялардың акцияларына да әсер етті. Coinbase биржасының акциялары 7,2%-ға өсіп, 210,48 доллар деңгейінде жабылды, бұл тамыз айындағы ең жоғары көрсеткіш болды. Robinhood трейдинг қызметінің акциялары 0,5%-ға ғана өсіп, 26,93 долларға жетті. Bitcoin майнингімен айналысатын MARA Holdings компаниясының акциялары 7%-ға артып, 18,08 доллар деңгейіне жетті. Riot Platforms акциялары 3,5%-ға көтеріліп, 9,08 доллар болды, ал Microstrategy компаниясының акциялары 0,11%-ға төмендеді.
Биткоинның өсу себептері
Сарапшылардың айтуынша, биткоинның соңғы уақыттағы өсуі Дональд Трамптың АҚШ президенттік сайлауында жеңіске жету ықтималдығының артуымен байланысты. Eaglebrook криптоинвестициялық платформасының бас директоры Крис Кингтің айтуынша, Трамптың жеңісі криптовалюта нарығына «өте жақсы әсер» етеді.
Сонымен қатар 14 қазан күні Харрис криптовалюталарға әділ заңнамалық реттеу енгізуді қолдайтынын мәлімдеді, бұл да биткоин мен криптокомпаниялар акцияларының бағасына әсер етті.
