Атырау мұнай өңдеу зауытының жөндеу жұмыстары мерзімінен бұрын аяқталды
Атырау мұнай өңдеу зауытының (АМӨЗ) жоспарлы жөндеу жұмыстары мерзімінен бұрын аяқталып, зауыт қондырғылары кезең-кезеңімен іске қосыла бастаған. Бұл жайлы АМӨЗ-дің баспасөз қызметі хабарлады.
«Атырау мұнай өңдеу зауытында жоспарлы-алдын алу жұмыстары аяқталды», – делінген хабарламада.
Баспасөз қызметінің хабарлауынша, зауыттың электрмен тұзсыздандыру қондырғысы-атмосфералық вакуумдық түтікше (ЭЛТҚ-АВҚ-3), бензин мен дизель отынын гидротазарту құрамдастырылған қондырғысы жөндеуден өтіп іске қосылған.
Сонымен бірге каталитикалық риформинг (ССR), күкірт өндіру, аралас күкірт өндіру, жеңіл газойльды гидротазарту (Prime D), нафтаны селективті гидрогенизациялау (Prime G+), нафтаны гидротазарту (Naphtha НТ) қондырғылары да белгіленген мерзімінен бұрын іске қосылған.
Зауыт жақын күндері басқа да қондырғыларды кезең-кезеңімен іске қосады. Солайша жөндеу жұмыстарын жүргізу үшін тоқтаған нысан біртіндеп өндіріс көлемін қалпына келтіреді.
«Қазіргі уақытта зауыттың мұнайды бастапқы өңдеуге арналған ЭЛТҚ-АҚ-2 қондырғысында іске қосу-баптау жұмыстары, ал каталитикалық крекинг, сұйытылған көмірсутекті газдарды күкіртсіздендіру (Sulfrex) және бутендерді олигомеризациялау қондырыларында іске қосу алдындағы жұмыстар жүргізілуде. Жабдықтар кезегімен технологиялық режимге шығарылып, өндіріс көлемі біртіндеп ұлғайтылады», – делінген хабарламада.
Сонымен бірге баспасөз қызметі зауыттың ішкі нарықты жанар-жағармаймен қамтамасыз ету үшін дизель отыны мен АИ-92 маркалы автобензинін жөнелтіп жатқанын хабарлады.
