Кеңес Рақышевқа тиесілі компания 4,4 млн доллар жұмсап, Tethys Petroleum-дағы үлесін арттырады
Кеңес Рақышевқа тиесілі Fincraft Group компаниясы Tethys Petroleum Limited («Tethys») компаниясының 8 443 398 жай акциясын сатып алып, ондағы үлесін 34,3%-ға жеткізеді. Бұл туралы компанияның баспасөз қызметі хабарлады.
«Сатып алынатын акциялар жалпы шығарылған жай акциялардың 7,35%-ын құрайды. Келісімге сәйкес, акциялар бір акция үшін 0,7719 канадалық доллар бағасымен сатып алынады. Бұл жалпы сомасы 6 518 134,39 канадалық долларды құрайды», – делінген баспасөз хабарламасында.
Құжаттарды рәсімдеуге байланысты сатып алу мәмілесі 2025 жылдың бірінші тоқсанында аяқталады деп жоспарланып отыр.
2024 жылдың 11 қазанында компания Tethys Petroleum-нің 30 959 133 жай акциясын сатып алатынын мәлімдеді. Бұл шығарылған жай акциялардың 26,95%-ын құрайды. Сол кезде айтылғандай, Fincraft Group Тethys Petroleum-нің 23 009 133 жай акциясын сатып алған. Ал соңғы мәміледен кейін компанияның жалпы акцияларының саны 39 402 531 жай акцияны құрайтын болады. Бұл жалпы шығарылған жай акциялардың 34,31%-ына тең. Солайша компания үлесі 7,35%-ға артады.
Компания бұл акцияларды инвестициялық мақсаттарда сатып алатынын мәлімдеді. Айта кетейік, Tethys Petroleum-нің бас кеңсесі Кайман аралдарында орналасқан. Компания мұнай мен табиғи газ кен орындарын игерумен және барлау жұмыстарымен айналысады.
