2025 жылы ҚТЖ, QazaqGaz және «Самұрық-Энерго» компанияларының IPO-сы өтеді
2025 жылы мемлекеттік үш ірі компанияның IPO-сы өтеді. Олар: ҚТЖ, QazaqGaz және «Самұрық-Энерго». Бұл туралы «KASE: Joining Tabadul Digital Hub» форумында Қаржы нарығын реттеу және дамыту агенттігі төрағасының орынбасары Мария Хаджиева айтып өтті.
«Бұдан басқа, компаниялардың IPO-ға шығуын ынталандыру үшін мемлекеттік қолдау көрсетудің түрлі тетіктері, сондай-ақ бағалы қағаздарды ішкі орналастыру үлесін 20%-дан 50%-ға дейін ұлғайту қаралып жатыр», – деді ол.
Соңғы бірнеше жылда KEGOC, «Қазатомөнеркәсіп», «ҚазМұнайГаз» және Air Astana ұлттық компанияларының IPO-сына жергілікті инвесторлардың қызығушылығы жоғары болған. Ішкі сұраныс ұсыныстан 1,5 -2 есе асып түскен.
«Қор нарығының инфрақұрылымы туралы айтатын болсақ, сауда-клирингтік жүйелерді толық жаңғырту жүргізілді. Клирингтің және орталық контрагенттің функциялары жеке ұйымға – капиталы шамамен 19 млн долларды құрайтын KASE клирингтік орталығына бөлінді», – деді Хаджиева.
Бұған дейін «Самұрық-Қазына» әл-ауқат қоры QazaqGaz ұлттық компаниясының IPО-сын кейінге қалдыратынын хабарлаған.
IPО-ны кейінге қалдыруға себеп – компания акцияларын жеке инвесторларға тартымды ету. Ал компанияның қазіргі қаржы және өндіріс көрсеткіші қойылатын талаптарға сай келмейді.
