Мемлекет блогерлерге кедергі жасамай, онымен дос болуы тиіс

Қырғызстан салық қызметінің басшысы Алмамбет Шықмаматов елдегі блогерлерге жеңілдік ұсынды. Бұл туралы жергілікті economist.kg басылымы жазды.

Шенеуніктің айтуынша, қырғыз блогерлері арнайы екі салық тәртібінің біреуін таңдай алады.

• Біріншісі – төмен табыс салығын (10%-дың орнына 5%) төлеп, 15 жыл бойы сақтандыру төлемінен босау.

• Екіншісі – 2027 жылға дейін табыстан 1%, одан кейін 2% салық төлеу. Мұнда да сақтандыру төлемінен босатылады.

«Ыңғайлы жағдай. Салықтан мүлдем босатуға да болмайды. Алайда өсуге жағдай жасау керек.

Блогерлік – қарқынды дамып келе жатқан сала. Оның мазмұнының қоғам үшін маңызы жоғары. Мемлекет блогерлерге кедергі жасамай, онымен дос болуы тиіс«, – дейді Шықмаматов.

Қырғызстан жергілікті блогерлерге жеңілдік ұсынып отырған уақытта, оған көрші Қазақстанда осы саладағы танымал тұлғаларға қатысты салық саясатын күшейтіп отыр. Мемлекеттік кірістер комитеті (МКК) 600-ге жуық қазақстандық блогердің салық төлемегенін олардың кәсіпкерлік қызметі туралы декларациясы мен салық органдарының есебін тексере отырып анықтаған.