Атырау облысындағы жүк көлігі мен пойыз соқтығысқан станцияда қозғалыс қалпына келді

Атырау облысындағы Теңдік станциясында теміржол қозғалысы қалпына келтірілді. Бір күн бұрын бұл станцияда жүк көлігі мен жүк пойызы соқтығысып қалған болатын. «Қазақстан Темір Жолының» (ҚТЖ) мәліметінше, қалпына келтіру жұмыстары аяқталып, жолаушылар пойызының қозғалысы қайта жанданған.

Апат салдарынан тепловоз бен 11 бос вагон рельстен шығып кетті. Қалпына келтіру жұмыстарына 167 маман, екі қалпына келтіру пойызы және алты бірлік автотехника жұмылдырылды.

Зардап шеккен локомотив пен вагондар көтеріліп, ұзындығы 200 метр зақымдалған жол учаскесі қайта қалпына келтірілді.

Апат кезінде локомотив бригадасының үш мүшесі зардап шеккен. Оларға қажетті медициналық көмек көрсетілген.

ҚТЖ мәліметінше, апатқа жүк көлігі жүргізушісінің теміржол өткелінен өту ережелерін бұзуы себеп болған.

Оқиға салдарынан алты жолаушылар пойызының қозғалысы кешіктірілді. Жолаушыларға ыстық тамақ беріліп, Атырау облысы әкімдігімен бірлесіп, Қарабатан станциясынан Атырау қаласының теміржол вокзалына дейін 10 автобус ұйымдастырылды.