Трамп Ресей мен Беларусьтің қарапайым азаматтарына АҚШ-қа кіруге тыйым салуы мүмкін
АҚШ президенті Дональд Трамп әкімшілігі 43 елдің, оның ішінде Ресей мен Беларусьтің азаматтары үшін кіру ережелерін қатаңдатуды көздеп отыр, деп хабарлады The New York Times басылымының дереккөздері.
Олардың мәліметінше, АҚШ Мемлекеттік департаменті елдерді «қызыл», «сарғылт» және «сары» деп үш санатқа бөлетін ұсыныстар жобасын әзірлеген.
«Қызыл» топқа кіретін 11 елдің азаматтарына АҚШ-қа кіруге қатаң тыйым салынады. Оларға Ауғанстан, Бутан, Куба, Иран, Ливия, Солтүстік Корея, Сомали, Судан, Сирия, Венесуэла және Йемен жатады.
«Сарғылт» топқа кіретін 10 елдің азаматтарына тек «бай іскер саяхатшылар» ретінде кіруге рұқсат беріледі, алайда иммиграциялық немесе туристік визалармен кіруге тыйым салынады. Бұл санатқа Ресей, Беларусь, Эритрея, Гаити, Лаос, Мьянма, Пәкістан, Сьерра-Леоне, Оңтүстік Судан және Түрікменстан кіреді.
«Сары» топқа енген 22 елге АҚШ билігінің алаңдаушылығын тудыратын мәселелерді шешу үшін 60 күн беріледі. Егер олар осы уақыт ішінде қажетті шараларды қабылдамаса, олар «қызыл» немесе «сарғылт» категорияға ауыстырылуы мүмкін.
The New York Times мәліметінше, бұл ұсыныстар 17-23 наурыз аралығында ресми түрде жариялануы мүмкін. Сонымен қатар, тізім әлі өзгеруі мүмкін, деп жазады басылым.
Бұған дейін дереккөздер Трамп Ресейдің энергетика және банк секторына жаңа санкциялар енгізуі мүмкін екенін хабарлаған.
