Нығматуллиннен қайтарылған «Сарыарқа» хоккей клубының 170 млн қарызы бар
Қарағандының «Сарыарқа» хоккей клубы 2021 жылдан бері қаржылық қиындықтарға тап болып, қарыз көлемі жылдан-жылға артып келеді. Соңғы мәліметтерге сәйкес, клубтың берешегі 170 млн теңгеден асып кеткен.
Қаржылық қиындықтар мен сот шешімі
Карағанды облыстық сотының азаматтық істер жөніндегі сот алқасы 2025 жылғы 27 ақпандағы қаулысында клубтың қаржылық жағдайы ауыр екенін нақтылады.
«Қызметкерлердің жұмысын уақытша тоқтатуға әкелген экономикалық себептердің бар екенін іс материалдары дәлелдейді: «UHY SAPA Consulting» компаниясының аудит қорытындысы, кредиторлардың талаптары, сот шешімдері және бухгалтерлік құжаттар. 2023 жылдың 31 наурызындағы мәлімет бойынша клубтың жалпы қарызы, оның ішінде жалақы мен міндетті аударымдар 170 433 141,77 теңгені құрады», – делінген сот қаулысында.
Клубтың меншік мәселесі және қайта мемлекетке қайтарылуы
2022 жылы «Сарыарқа» хоккей клубы өз бетінше келісімшарттар жасап, жауапкершілігі шектеулі серіктестік (ЖШС) ретінде жұмысын жалғастырған. Алайда 2023 жылдың шілдесінде прокуратура заңсыз берілген 37 жер телімін және 900 млн теңгеге бағаланған «Сарыарқа» хоккей клубын мемлекетке қайтарғанын мәлімдеді.
Осыған қатысты Қарағанды облысының әкімі Ермағанбет Бөлекпаев клуб 5 жыл бойы Арғын Нығматуллиннің сенімгерлік басқаруында болғанын және 2023 жылы мемлекетке қайтарылғанын атап өтті. Әкім клубтың қаржылық жағдайы жақсарғанын айтып, заңсыз байыту немесе теріс пайдалану фактілері тіркелмегенін мәлімдеген болатын.
Экс-директорға іздеу жарияланды
Алайда қазіргі уақытта Қазақстанның Бас прокуратурасы «Сарыарқаның» бұрынғы директоры Арғын Нығматуллинді іздестіріп жатыр. Оған Қарағанды облысындағы хоккей дамуына бөлінген бюджет қаражатын жымқырды деген айып тағылған.
