Amazon TikTok-ты сатып алу бойынша ұсыныс жасады
Миллиардер Джеф Безосқа тиесілі Amazon компаниясы соңғы сәтте TikTok-тың америкалық бөлімшесін сатып алу бойынша ұсыныс жасады. Бұл туралы дереккөздеріне сілтеме жасап, The New York Times жазады.
Әңгіме компанияның АҚШ-тағы барлық активін толық сатып алу туралы болып отыр. Басылым дереккөзінің айтуынша, Amazon ұсынысын АҚШ вице-президенті Джей Ди Вэнс пен Сауда министрі Говард Лютникке хат түрінде жолдаған.
АҚШ президенті Дональд Трамп TikTok-тың қытайлық ByteDance компаниясынан бөлініп, өзге меншік иесіне өтуі бойынша мәміле 5 сәуірге дейін аяқталатынын мәлімдеді. Reuters агенттігінің хабарлауынша, егер TikTok-тың қытайлық иесі белгіленген мерзімге дейін Қытайдан тыс сатып алушы таппаса, АҚШ-та бұғатталуы мүмкін.
АҚШ билігі ByteDance қолданушылардың деректерін Қытай үкіметіне беріп отырады деп санайды. Америкалық үкіметтің пікірінше, Бейжің бұл қосымшаны деректер жинау және АҚШ саясатына ықпал ету мақсатында пайдалана алады.
Соңғы уақытта қазақстандық қолданушылар TikTok-тың өте баяу жұмыс істей бастағаны жайлы шағымданған еді. Платформадағы видеолардың жүктелуінде қиындық туындаған. Мәдениет және ақпарат министрі Аида Балаева бұл платформадағы заңсыз контенттің тым көп екендігіне байланысты деп түсіндірді.
