Қызылордада секс-құлдыққа түскен қыздың ісі: сот үкімі шықты

Қызылорда облысының кәмелетке толмағандардың істері жөніндегі мамандандырылған ауданаралық сотында секс-құлдыққа түскен оқушы қызға қатысты қылмыстық іс қаралды деп хабарлайды KursivMedia.

Адамдар тобына, оның ішінде кәмелетке толмағандарға ірі мөлшерде пайда табу мақсатында қорқытып алушылық, көрінеу кәмелетке толмаған адамға қатысты азаптау, кәмелетке толмағанды жезөкшелікпен айналысуға тарту әрекеті негізінде қылмыстық іс қаралды.

Сот үкімімен кәмелетке толмаған М.Н., А.Ж., Қ.Д. кәмелетке толмағанды жезөкшелікпен айналысуға тарту, ірі мөлшерде пайда табу мақсатында қорқытып алу, кәмелетке толмаған адамды азаптағаны үшін кінәлі деп танылып, 6 жыл 8 ай бас бостандығынан айырылды.

Сотталушы Б.А. ірі мөлшерде пайда табу мақсатында қорқытып алу әрекетін жасағаны үшін кінәлі деп танылып, 4 жыл 8 айға бас бостандығынан айырылды.

Сотталушы Т.Ұ. және Қ.А. ірі мөлшерде пайда табу мақсатында қорқытып алуға көмектескені үшін кінәлі деп танылып, 4 жыл 8 айға бас бостандығынан айыру туралы үкім шықты.

Сотталушы Т.А., Б.А. және Т.Д. кәмелетке толмағанды жезөкшелікпен айналысуға тарту, ірі мөлшерде пайда табу мақсатында қорқытып алу әрекетін жасағаны үшін кінәлі деп танылып, 7 жыл 6 айға сотталды.

Үкім заңды күшіне енген жоқ.

Айта кетейік, 2024 жылдың тамызында Қызылорда қаласында «16 жасар оқушы қызды сыныптастары жезөкшелікпен айналысуға мәжбүрлеген» деген ақпарат тараған. 

Бұған дейін 16 жастағы оқушы қызды қатарластары зорлады деген ақпарат тарады. Жыныстық құлдықта болған қызды бопсалаған, өзін лауазымды қызмет иесімін деп таныстырған адам Қылмыстық Кодекстің 194-бабы бойынша кінәлі деп танылды. Ол 4 жыл 6 айға бас бостандығынан айырылды.

2024 жылдың желтоқсанында жезөкшелiкпен айналысуға, сексуалдық сипаттағы өзге де қызметтерді көрсетуге арналған притондар ұйымдастыру немесе оларды ұстау және жеңгетайлық жасаған айыпталушы 4 жыл 6 ай мерзімге бас бостандығынан айырылды.