2040 жылға қарай Қазақстанда су тапшылығы 50%-ға жетуі мүмкін
2040 жылға қарай Қазақстанда су тапшылығы 50%-ға жетуі мүмкін. Өйткені гидротехникалық құрылыстар тозған және білікті мамандар жетіспейді. Осындай мәліметтер келтірген сенатор Сәкен Арубаев елдегі су саласына қатысты алаңдаушылық білдірді.
Депутаттың пайымынша, Қазақстанды су тапшылығы қаупі күтіп тұр.
«БҰҰ болжамы бойынша, 2040 жылға қарай елдегі су ресурсының тапшылығы 50%-ға жетуі мүмкін. Бұл жағдайды гидротехникалық құрылыстардың тозуы, ауыл шаруашылығы саласында судың 40 пайызы жоғалуы, сондай-ақ білікті мамандар жетіспеушілігі одан сайын қиындатады», – деді сенатор Үкімет басшысына жолдаған сауалында.
Сәкен Арубаев су шаруашылығы саласында жұмыс істейтін мамандардың 70%-ның білімі сәйкес келмейтінін айтады. Тіпті арасында мамандығы мүлдем жоқтары да бар.
«Жыл сайын бұл бағытта 200 жоғары, 100 техникалық және кәсіптік білімі бар мамандар дайындалса, олардың тек бестен бірі ғана өз мамандығымен жұмысқа орналасады. Су ресурстары және ирригация министрлігі құрылғанына және Қазақ ұлттық Су шаруашылығы және ирригация университеті ашылғанына қарамастан, жоғары оқу орны күрделі проблемаларға тап болып отыр. Инфрақұрылымның ескіруі, зертхана жабдықтарының жетіспеуі, студенттер мен оқытушылардың жеткіліксіз саны маман даярлауға зор қауіп төндіріп отыр«, – деді сенатор.
Сенатор қандай ұсыныс жасады
Депутат кадр санын арттыру үшін мемлекеттік тапсырыстар мен гранттар санын көбейту каерек деп санайды. Бұдан бөлек, мамандардың жалақысын өсіру де маңызды екенін атап өтті.
«Оқытушылардың біліктілігін арттыру үшін шетелдік жоғары оқу орындарымен академиялық өзара тәжірибе алмасу бағдарламаларын кеңейтуді жандандыру керек«, – деп мәлімдеді сенатор.
Мемлекет басшысы Қасым-Жомарт Тоқаев көршілес Қытай су үнемдейтін технологияларының тәжірибелерімен бөлісуге дайын екенін, алайда қазақстандық шенеуніктер оған құлық танытпай отырғанын айтқан еді.
