Тасмағамбетова мен Рақышев Шымкенттегі мәдениет сарайының құрылысын қаржыландырады
Тасмағамбетовтың қызы мен күйеубаласы Шымкентте «Фосфоршылар мәдениет сарайын» салады. Әсел Тасмағамбетова мен Кеңес Рақышев құрылыс басталған жерде капсула салу рәсіміне қатысқан.
Бұрынғы «Фосфоршылар мәдениет сарайы» жарамсыз деп танылып, 2024 жылы сүрілген. Енді ескі ғимараттың орнына жаңа нысан бой көтереді. Бұл жобаны Шымкент әкімдігі «Сәби» қорының қолдауымен жүзеге асырмақшы.
«Бұл нысанның құрылысы болашаққа жасалған маңызды инвестиция болмақ. Жаңа мәдениет сарайы қаланың дамуына серпін беретін жаңа мәдени орталыққа айналады, – деп мәлімдеген салтанатты шараға қатысқан шаһар басшысы Ғабит Сыздықбеков.
Ал Әсел Тасмағамбетова жаңа «Фосфоршылар мәдениет сарайы» – Шымкенттің мәдени дамуының жаңа кезеңіне жол ашатынын айтқан.
«Сарай тек жаңа дағдыларды меңгеруге мүмкіндік беретін білім беру орталығы емес, сонымен қатар, әр жастағы тұрғындарды біріктіретін қоғамдық кеңістік болады. Даму тұжырымдамасында ұрпақтар арасындағы мәдени байланысты нығайту мен дәстүрлерді сақтауға ерекше мән бердік», – деп мәлімдеген Тасмағамбетовтың қызы.
Жаңа мәдениет сарайы несімен ерекшеленеді?
Жаңа мәдениет сарайы бірнеше бағытта жұмыс істейтін көпсалалы орталыққа айналады. Атап айтқанда, орталықта мынадай алаңдар ашылады:
- IT-хаб, креативті хаб және қоғамдық бастамалар хабы;
- креативті индустрия алаңдары;
- суретшілер шеберханасы;
- көрме залы,
- амфитеатр;
- коворкинг;
- кеңсе бөлмелері;
- форум алаңы;
- сән көрсетіліміне арналған трансформер-сахна;
- бизнес-инкубатор;
- фото және видеостудия, дыбыс жазу студиясы;
- подкаст алаңы;
- конференц-зал және экологиялық бастамалар мен ата-аналар клубтары ашылады.
Бұл жерде IT-модельдеу және робототехника, тұрмыстық шаруашылық, руникалық жазу, домбыра тарту, шахмат, бассейн, үлкен теннис, футбол, күрес, көркем гимнастика бойынша сабақтар өткізіледі.
Ғимарат Шымкенттің тарихи және заманауи элементтеріне сәйкес тұрғызылады. Қаланың жаңғырту жоспарына сәйкес, нысан маңындағы аумақ кешенді түрде абаттандырылып, саябақтар мен аллеялар, субұрқақтар және заманауи балалар алаңдары салынады.
