TikTok-тың АҚШ-тағы активтерін сату жөніндегі келісім кейінге қалдырылды. Бұл туралы Reuters агенттігі хабарлады. Бұған АҚШ президенті Дональд Трамптың Қытайға қарсы жаңа тарифтер енгізгені себеп болған.
Трамп қытайлық ByteDance компаниясына TikTok-тың америкалық активтерін шетелдік емес, америкалық инвесторларға сатуға берілген мерзімді қосымша 75 күнге ұзартты. Әйтпесе, TikTok-қа АҚШ аумағында тыйым салынатыны туралы заң 2024 жылы қабылданып, бұғаттау қаңтарда күшіне енуі тиіс еді.
Reuters дереккөздерінің мәліметінше, мәміле құрылымы сәрсенбіге қарай негізінен келісілген. АҚШ-та орналасатын жаңа компания құруды көздеген. Бұл компанияға TikTok-тың америкалық активтері тиесілі болып, басқару америкалық инвесторлар қолына өтетін еді. ByteDance компаниясының үлесі 20%-дан аспауы керек болатын.
Мәміле қазіргі және жаңа инвесторлармен, ByteDance компаниясымен және АҚШ үкіметімен келісілген. Алайда сенбі күні ByteDance мәлімдеме жасап, келіссөздер жалғасып жатқанымен, тараптар арасында бірқатар маңызды мәселелер бойынша ортақ шешімге келу мүмкін болмағанын хабарлады.
«Біз АҚШ үкіметімен келіссөздерді жалғастырып жатырмыз, бірақ келісімге қол жеткізілген жоқ. Бірқатар маңызды мәселелер бойынша келіспеушіліктер бар», – делінген ByteDance-тің WeChat-тағы ресми мәлімдемесінде.
Сондай-ақ компания Қытай заңнамасына сәйкес кез келген мәміле арнайы тексеруден өтуі тиіс екенін де атап өтті.
Қытайдың Вашингтондағы елшілігі де мәміле жайлы пікір білдіріп:
«Қытай TikTok мәселесіне қатысты өз ұстанымын бірнеше рет жеткізді. Біз компаниялардың заңды құқықтары мен мүдделерін әрдайым қорғаймыз және нарықтық экономиканың негізгі қағидаттарына қайшы келетін әрекеттерге қарсымыз», – деп мәлімдеді.
Жақында енгізілген жаңа тарифтерден кейін Қытайдан АҚШ-қа экспортталатын тауарларға орташа 54% баж салығы салына бастады. Жұма күні Қытай да өз кезегінде жауап ретінде қарсы шаралар мен қосымша салықтар енгізді.
Трамп бұған дейін келісім жасалса, тарифтерді төмендетуге дайын екенін айтқан. TikTok-ты АҚШ-та 170 миллион адам пайдаланады. Қазір оның болашағы келісімнің Қытай тарапынан мақұлдануына тікелей байланысты.
Трамптың айтуынша, TikTok мәмілесіне қатысты төрт инвесторлық топпен келіссөздер жүріп жатыр, бірақ олардың аттары жарияланған жоқ.
Еске салсақ, 2024 жылы АҚШ Конгресі TikTok-қа тыйым салуды қолдап, бұл платформаны Қытай үкіметінің америкалықтарға әсер ету мен тыңшылық жасау құралы болуы мүмкін деп мәлімдеген. Заңға сол кездегі президент Джо Байден қол қойған еді.
