Қазақстанда 800 мыңға дейін киік етке өткізілуі мүмкін
Экология және табиғи ресурстар министрлігі алдағы уақытта алынатын киіктердің етін қайта өңдеу мәселесін қарастырып жатыр.
Министр Ерлан Нысанбаевтың айтуынша, қазір ведомство ет комбинаттарын салу зерделеніп жатыр. Бұл мақсатқа инвесторлар тартылуда.
Ғылыми негіздемеге сәйкес, Қазақстан киіктердің 20 пайызын етке өткізуі мүмкін. Бұл – шамамен 800 мың бас.
«Пайыздық үлес анықталды: 40% – аталықтар, 40% – аналықтар, 20% –төлдер. Бізде нақты сандар мен параметрлер бар. Қазір дайындық жұмыстары жүріп жатыр», — деді министр Үкімет отырысында.
Киіктердің еті өңдеуге жіберілуі мүмкін. Қазірдің өзінде алты компания ет комбинаттарын салуға қызығушылық білдіріп отыр.
«Біз әкімдіктермен бірлесіп, киік етін қайта өңдеуге арналған ет комбинаттарын құруға бағытталған инвестициялық жобаларды пысықтап жатырмыз. Бүгінде алты компания қызығушылық танытты», — деді Нысанбаев.
2025 жылғы көктемгі есепке сәйкес, Қазақстанда 3,9 млн киік бар. Оның ішінде 2,3 млн – Орал популяциясы, 1,6 млн – Бетпақдала популяциясы, ал 78 мың – Үстірт популяциясы.
Мұның алдында Тоқаев Қытай үкіметіне 1,5 мың киік сыйлау туралы шешім қабылдаған болатын.
