Росатом Түркия АЭС-індегі үлесін сатқалы жатыр
Ресейдің атом энергетикасы саласындағы мемлекеттік компаниясы – «Росатом» Түркияда салынып жатқан құны 25 миллиард доллар болатын атом электр станциясындағы 49% үлесін сатуға қатысты келіссөздер жүргізіп жатыр, деп хабарлады Bloomberg агенттігі.
Бұл туралы «Росатомның» Аккую станциясына жауапты еншілес компаниясының директорлар кеңесінің төрағасы Антон Дедусенко Стамбулда өткен Атом электр станциялары көрмесі мен саммиті аясында агенттікке берген сұхбатында айтқан.
«Электр энергиясын өндіретін алғашқы блокқа жақындаған сайын, бізге қызығушылық танытқан инвесторлар саны арта түсуде», – деді ол.
2018 жылы «Росатом» үлесін сату әрекеті сәтсіз аяқталған. Ол кезде түрік консорциумы Cengiz Holding AS, Kolin Insaat Turizm Sanayi ve Ticaret AS және Kalyon Insaat Sanayi ve Ticaret AS келісімшарттың коммерциялық шарттары бойынша ортақ мәмілеге келе алмағандықтан жобадан шыққан болатын.
Мұнара қуаты 4,8 гигаватт болатын әрі Түркиядағы алғашқы атом электр станциясы саналатын бұл нысандағы бірінші блок қазіргі уақытта сынақтан өтуде. Ол 2026 жылы электр қуатын желіге жеткізе бастайды деп күтіліп отыр.
«Жыл соңына дейін электр қуатын желіге қосуға қажетті жүйелер дайын болады деп сенемін», – деген ол.
Жоба көптеген кідірістер мен қаржыландыру мәселелеріне тап болған, өйткені АҚШ санкцияларынан қауіптенетін шетелдік банктер бұл жобадан бас тартқан. Осыған байланысты Түркия мен Ресей құрылысқа төлем жасаудың балама жолдарын іздеуде, оның ішінде табиғи газды айырбастау сияқты тәсілдер қарастырылып жатыр.
Бұған дейін, дәл осы «Росатом» Қазақстандағы алғашқы АЭС жобасы бойынша консорциум көшбасшысы атанған. Артынша Атом энергиясы жөніндегі агенттік мұндай шешімнің себебін түсіндірген. Ұзамай Қазақстан мен Ресей АЭС салу жөніндегі жол картасына қол қойған. Ресей Қазақстаннан бөлек, Өзбекстанда екі АЭС салғалы жатыр.
