Әлемдегі ең қауіпсіз автокөліктер тізімі жаңарды: IIHS краш-тест нәтижелері қандай?
Volvo көп жылдар бойы автокөліктер қауіпсіздігінің эталоны саналып келді. Швед бренді жүргізуші мен жолаушылардың өмірін сақтауға бағытталған инженерлік шешімдердің синониміне айналды. Алайда АҚШ-тың Жол қозғалысы қауіпсіздігін сақтандыру институты (IIHS) жүргізген соңғы краш-тест нәтижелері бұл дәстүрлі түсінікті өзгертіп отыр. Енді көш басында – Оңтүстік Кореяның Hyundai және Kia компаниялары.
IIHS тесттері не көрсетті?
IIHS – әлемдегі ең беделді автокөлік қауіпсіздігін бағалайтын институттардың бірі. 2025 жылғы жаңартылған сынақтар аясында екінші қатардағы жолаушылардың қорғалуы, соқтығысудың алдын алу жүйелері және бүйірлік соққы кезіндегі қауіпсіздікке қойылатын талаптар күшейтілді.
Осы жаңа талаптар бойынша Hyundai Ioniq 6, Kia Telluride және Kia EV9 үлгілері ең жоғары Top Safety Pick+ марапатына ие болды. Бұл модельдер барлық жаңа талаптарды толық орындап, екінші қатардағы жолаушылар мен балалар креслосындағы қауіпсіздікті тиімді қамтамасыз етті. Ал Volvo-ның кейбір модельдері артқы орындықтағы қорғанысты жеткілікті деңгейде қамтамасыз ете алмады, бұл олардың рейтингінің төмендеуіне әсер етті.
Volvo неге позициясын жоғалтып жатыр?
Volvo көліктері әлі де қауіпсіздіктің жоғары деңгейін сақтап отыр, бірақ бұрынғыдай сөзсіз көшбасшы емес. Мұның бірнеше себебі бар:
- Volvo соңғы жылдары қауіпсіздіктен гөрі электрификация мен цифрлық технологияларға басымдық беріп келеді. Бұл арада бәсекелестері жаңа қауіпсіздік талаптарына тез бейімделе алды.
- IIHS жаңа әдістемесі Volvo көліктеріндегі кейбір әлсіз тұстарды көрсетті. Мысалы, жолаушылар тізесін қорғау деңгейі мен түнгі уақытта автоматты тежеу жүйесінің тиімділігі.
- Hyundai Motor Group қауіпсіздікке көп инвестиция құйып, бұл бірден өз нәтижесін бере бастады. Олар белсенді және пассивті қорғаныс жүйелерін жаңартып, нақты артықшылыққа ие болды.
Жаһандық контекст
Hyundai мен Kia-ның қауіпсіздік бойынша жетістіктері тек АҚШ-пен шектелмейді. Euro NCAP (Еуропа), ANCAP (Австралия), KNCAP (Корея) сияқты жетекші қауіпсіздік ұйымдары да осы брендтердің жаңа үлгілерін жоғары бағалады. Мәселен, Hyundai Ioniq 6 пен Kia EV6 Еуропада жаяу жүргіншілерді тану, балаларды қорғау және автоматты тежеу жүйесі бойынша ең жоғарғы ұпай жинады.
Қазақстанда да бұл тренд байқала бастады. 2024 жылдың екінші жартысында Hyundai Tucson, Kia Sportage және Kia K5 сияқты модельдер сатылым бойынша үздік ондыққа кірді. Отандық сатып алушылар да қауіпсіздікке көбірек мән бере бастады. Бұл әлемдік тенденцияның жергілікті нарыққа әсері екені анық.
Автонарыққа әсері
Қауіпсіздік саласындағы көшбасшының ауысуы – тек тұтынушылар үшін ғана емес, бүкіл автоөнеркәсіп үшін маңызды белгі. Қазіргі сатып алушылар бренд беделіне емес, нақты тәуелсіз тест нәтижелеріне сүйеніп шешім қабылдайды. Hyundai мен Kia жоғары қауіпсіздік деңгейі тек люкс емес, орташа баға сегментіне де қолжетімді екенін дәлелдеді.
Volvo-ға бұрынғы беделін қайтару үшін жаңа серпіліс қажет. Бұл қауіпсіздік саласында жаңа инновациялардың пайда болуына түрткі болуы мүмкін. Ал Hyundai мен Kia болса, келесі буын модельдерін дайындап жатыр және оларда да басты басымдық – жолаушы қауіпсіздігі болмақ.
Volvo-ның автомобиль қауіпсіздігі саласындағы сөзсіз көшбасшылық кезеңі аяқталып келеді. Бүгінгі таңда бұл атақ Hyundai мен Kia-ға тиесілі. Олар бұрынғы көшбасшыларды қуып жетіп қана қоймай, жаңа меже орнатып отыр. XXI ғасырда «ең қауіпсіз көлік» атағын жыл сайын қайтадан дәлелдеу қажет. Себебі әлемдік нарықта бәсеке күшейді.
Бұған дейін әлемде ең қауіпті көліктер туралы жазған едік. iSeeCars порталы АҚШ-та арнайы зерттеу жүргізіп, жол-көлік оқиғаларын талдады. Нәтижесінде Hyundai Venue антирейтингтің бірінші сатысынан табылған болатын.
