Қазақстанда Сингапур тәжірибесі бойынша цифрлық трансформация карталары әзірленеді
Қазақстанда Сингапур тәжірибесі бойынша цифрлық трансформация карталары әзірленеді. Бұл туралы Үкіметте ЖИ-ді дамытуға қатысты өткен жиында айтылды.
Үкімет үйінің хабарлауынша, суперкомпьютермен ЖИ экожүйесін құру бойынша Олжас Бектенов Цифрландыру мәселелері жөніндегі комиссияның отырысын өткізген.
Жиында іске қосылған суперкомпьютер негізінде жасанды интеллект экожүйесін дамыту мәселелері қаралып, QazTech платформасы базасында мемлекеттік органдардың жұмысын одан әрі цифрлық трансформациялау бағыттары талқыланған.
Қазақстанда қабылданған 2024-2029 жылдарға арналған ЖИ-ді дамыту Тұжырымдамасы негізінде «Жасанды интеллект туралы» заң жобасы әзірленген. Оның аясында ЖИ саласында кадрлар даярланып, AI Corporate, TUMO Center, AI People сынды бағдарламалар әзірленіп жатыр. Бұдан бөлек E-agent, egov AI, AI-терапевт, tax helper, SDU және E-аудармашы сияқты цифрлық шешімдер ұсынылады.
Салаларды ЖИ көмегімен цифрландыру IT-шешімдерді іске қосу мерзімін 1,5-3 жылдан 6 айға дейін қысқартады. Сонымен бірге барлық мемлекеттік органдар бір уақытта озық халықаралық және Сингапур тәжірибесі негізінде цифрлық трансформация карталарын әзірлемекші.
«Бұл карталар жасанды интеллект пен заманауи технологияларды қолдана отырып, негізгі процестерді жеңілдетуге және жеделдетуге бағытталған. Басты назар ескірген процедураларды қайта өңдеуге, деректерді цифрландыруға, сондай-ақ, E-Otinish, 109 және әлеуметтік желілер арқылы келіп түскен азаматтардың сұраныстарын қайта өңдейді», – делінген үкімет хабарламасында.
Олжас Бектенов бір ай ішінде цифрлық трансформация карталарын енгізу бойынша жұмыстарды аяқтауды тапсырған. Бұл карталар ЖИ-ды интеграциялауға, сондай-ақ бизнеске де мемлекеттік деректер базасында өз жобаларын жүзеге асыруға жол ашады.
Айта кетейік, DIGITAL Almaty форумында Бектенов 1 млн адамды жасанды интеллект бойынша оқытылатынын айтқан болатын.
