Алматы маңында өрт қауіптілігінің 5-санаты жарияланды

Алматы қаласы мен маңындағы аймақтарда 5-санаттағы төтенше өрт қаупі жарияланды. Бұл туралы Алматы қалалық Төтенше жағдайлар департаменті мәлімдеді.

28 шілдеге дейін қалада аптап ыстық 35-39°C деңгейінде сақталады. Мұндай жағдайда тіпті кішкене ғана ұшқын үлкен өртке ұласуы мүмкін, деп ескертеді билік өкілдері.

Жыл басынан бері Алматыда 300-ден астам құрғақ шөптің жану дерегі тіркелген, олардың кейбірі тау бөктерінде өртке ұласқан және тұрғын үйлерге қауіп төндірген.

Қазіргі таңда ТЖД пен қала әкімдігі бірігіп, 104 шақырым аумақта құрғақ шөп пен өсімдіктерді шабу жұмыстарын жүргізіп жатыр. Тұрғындар мен қала қонақтарына мынадай қауіпсіздік шараларын сақтау ұсынылды:

• Құрғақ шөп маңында от жақпау, темекі шекпеу;
• Қоқыс пен шөп қалдықтарын өртемеу;
• Электр желісін шамадан тыс жүктемеу, бір розеткаға бірнеше қуатты құрылғы қоспау;
• Балаларды жабық автокөлікте қалдырмау;
• Күннің ыстығында ұзақ уақыт далада жүрмеу, күн өтуінен сақ болу.

Мамандар тұрғындарды аса сақ болуға және қауіпсіздік ережелерін қатаң ұстануға шақырады.

Еске сала кетейік, 26 шілде күні Алматыда Кеңсай аумағында 15 гектар жер өртенген еді.