Рыбакина мен Путинцева US Open турнирін жеңіспен бастады

Нью-Йоркте жылдың соңғы «Үлкен дулыға» жарысы – АҚШ ашық чемпионаты (US Open) басталды. Қазақстандық теннисшілер алғашқы айналымда сәтті өнер көрсетті.

Елена Рыбакина (10 WTA) турнирді сенімді жеңіспен бастады. Алғашқы айналымда ұйымдастырушылардан арнайы шақырту (wild card) алған, ITF Juniors рейтингінде бірінші орында тұрған америкалық Джульетта Пареханы 6:3, 6:0 есебімен ұтты. Кездесу бір сағаттан аса ғана уақытқа созылды. Екінші айналымда Рыбакина Чехия өкілі, әлемдік рейтингтің 96-сатысындағы Тереза Валентоваға қарсы ойнайды.

Тағы бір қазақстандық теннисші Юлия Путинцева (55 WTA) да жарысты жеңіспен бастады. Бірінші айналымда Италия спортшысы, әлемнің 85-ракеткасы Элизабетта Коччареттоны 6:4, 7:6 (7:4) есебімен жеңіп шықты. Екінші кезеңде Путинцева ресейлік Анна Калинская (29 WTA) мен америкалық Клерви Нгуну (WC) арасындағы кездесу жеңімпазымен кездеседі.

Айта кетейік, бұған дейін Елена Рыбакина АҚШ-та өткен WTA 1000 санатындағы Цинциннати турнирінде финалға дейін жете алмай, жартылай финалда жарыстан шығып қалған еді.