Алматыда Конституция күні қалай аталып өтеді

Алматыда Конституция күніне орай 30 тамызда театрландырылған қойылымдар, концерттер мен мәдени шаралар өтеді.

Биыл Қазақстан Конституциясына 30 жыл толады. Сондықтан Алматыда бұл күн ерекше аталып өтпек.

Басты бағдарлама – Абай алаңында

Салтанатты бөлім 18:00-де Мемлекеттік Туды шығарып, Әнұранды орындаумен басталады. Одан кейін 200-ден астам әртіс қатысатын театрландырылған қойылым ұсынылады. Сахнада еңбек адамдарының, әскери қызметкерлердің бейнесі көрсетіліп, музыкалық сүйемелдеуді опера және эстрада әншілері Мемлекеттік хор капелласымен бірге орындайды.

Кештің әртістер қатарында – Роза Рымбаева, Тамара Асар, Жанар Айжанова, Айгүл Қосанова, IL Canto квартеті, «МузАрт Life» тобы, Әли Оқапов, Temirlan & Yernat, Зарина Алтынбаева, Рүстем Нұржігіт, Ақбота-Нұр Сейтмағамбет, Ерназар Жұбан, «Сазген сазы» этноансамблі және AL Jazz Symphony оркестрі бар.

Ашық аспан астындағы спектакль

19:00-де Республика сарайының алдында Асанәлі Әшімов негізін қалаған «Жаңа ғасыр» театры «Алматы – махаббатым» музыкалық қойылымын сахналайды.

20:00-де осы алаңда «Алматы әуендері» концерті басталады. Онда Саят Нұрғазин, Абик Жексен, Kyle Ruh, Інжу Ануарбек, Димаш Дәулетов, Бейбітгүл Нұрымқожина, «Арқайым» дуэті, Елдар Омаров, Тахмина Ашимбекова, Дәурен Байбөрі, Дәлел Уәшев және ASU ансамблі өнер көрсетеді.

Open-air концерттің басты жұлдыздары – Yenlik пен Қайрат Нұртас. Бағдарлама 22:00-де аяқталады.

Қала аудандарындағы шаралар

27–29 тамыз күндері Алматының әр ауданында концерттер, мәдени бағдарламалар мен кездесулер өтеді:

Жетісу ауданы, Мәдениет үйі (Кемел ықшамауданы) – 27 тамыз, 11:00. «Тәуелсіз елдің тұғыры – Ата Заң» концерті.

Алмалы ауданы, Арбат – 28 тамыз, 16:00. «30 жыл ел тірегі – Ата Заң» мерекелік концерті.

Бостандық ауданы, ҚазҰУ акт залы – 28 тамыз, 15:00. Салтанатты концерт.

Алатау ауданы, Атлетикалық ауыл – 29 тамыз, 17:00. Мерекелік концерт.

Әуезов ауданы, «Нархоз» университеті – 29 тамыз, 15:00. «Ата Заң – Тәуелсіз ел тұғыры» концерті.

Наурызбай ауданы, әкімдік амфитеатры – 29 тамыз, 16:00. Концерттік бағдарлама.

Медеу ауданы, Оқушылар сарайы – 29 тамыз, 11:00. Мерекелік концерт.

Түрксіб ауданы, №6 Оқушылар үйі – 29 тамыз, 11:00. Салтанатты концерт.

Ғылыми-тәжірибелік конференция

29 тамыз күні сағат 11:00-де Достық үйінде мәслихат депутаттары, Қоғамдық кеңес өкілдері, тарихшылар мен сарапшылар қатысатын конференция өтеді.