«Қайрат» клубы Орталық стадионды жалға алғаны үшін 131 млн теңге төлеуге міндеттелді
Сот «Қайрат» футбол клубын Орталық стадионды жалға алғаны үшін 131 млн теңге төлеуге міндеттеді. Алматы қаласының Спорттық нысандар дирекциясы клубтан 131 млн теңге өндіріп алу жөнінде арыз түсірген. Бұл туралы BESMedia басылымы хабарлады.
Дирекция «Қайрат» клубының 2021–2023 жылдар аралығында стадионды төмендетілген тарифпен жалға алып келгенін алға тартқан. Нәтижесінде тиісті көлемде кіріс кірмеген. Жүргізілген аудит және қалалық ревизиялық комиссия клубтың расымен стадионды төмен тарифпен жалға алып келгенін, нәтижесінде мемлекеттің тиісті кіріс ала алмай қалғанын растаған.
Алайда, дирекцияның бұл талабымен «Қайрат» клубының өкілдері келіспей, келісімшартта жылдық жалдау ақысы 30 миллион теңге көлемінде бекітілгенін, ал 2021 жылғы келісімшарт бойынша талап қою мерзімі өтіп кеткенін мәлімдеген.
Сот клубтың бұл дәлелдерін негізсіз деп тауып, дирекция талабын қанағаттандырған.
«Қайрат» клубы Орталық стадионда:
- 2021 жылы 25 матч, 31 жаттығу;
- 2022 жылы 18 матч, 17 жаттығу;
- 2023 жылы 18 матч, 29 жаттығу өткізген.
Бұлардың барлығын есептегенде стадионды жалға алу құны жалпы 322,5 миллион теңгені құрауы керек болған. Ал клуб бұл кезеңде 125,1 миллион теңге төлеген. 2024 жылдың 9 айы үшін 66 млн теңге төлеген. Осылайша, мемлекетке келтірілген залал 131 миллион теңгеге бағаланған.
«Алматы қаласының Спорттық нысандар дирекциясының пайдасына «Қайрат» футбол клубынан 131 008 000 (жүз отыз бір миллион сегіз мың) теңге, сондай-ақ мемлекеттік баж салығы ретінде 3 930 240 (үш миллион тоғыз жүз отыз мың екі жүз қырық) теңге өндірілсін», – делінген сот шешімінде.
Еске сала кетсек, 26 тамызда «Қайрат» футбол клубы Шотландияның «Селтик» футбол командасымен кездесіп, жеңіске жеткен болатын. Пенальти сериясында «Қайрат» басым түсті. Жас қақпашы Темірлан Анарбеков қақпаға доп жібермеді. Солайша «Қайрат» алғаш рет Чемпиондар лигасының топтық кезеңіне шықты.
