Алматыда кафе жанына заңсыз салынған ғимарат сүрілді

Алматыда заңсыз салынған қосалқы нысан сүрілді. Бұл туралы Алматы әкімдігінің Қала құрылысын бақылау басқармасы хабарлады.

«Жұмабаев көшесі, 23Б мекенжайындағы кафе жанында салынған қосалқы нысан сот шешімі бойынша бұзылатын болды», – делінген басқарма хабарламасында.

Бұл нысанның заңсыз салынғанын басқарма қызметкерлері жоспардан тыс тексеру барысында анықтаған. Меншік иесі нысанды рұқсат құжаттарынсыз салған.

Басқарма меншік иесін әкімшілік жауапқа тартқан. Ал кейін бұл іс қалалық әкімшілік құқық бұзушылық жөніндегі Мамандандырылған ауданаралық сотына жолданған.

2025 жылдың 27 маусымында Маманданыарылған ауданаралық соты меншік иесін кінәлі деп тапқан. Кафе қожайыны сот шешімі бойынша заңсыз тұрғызылған құрылысты бұзуы керек болған.

Әкімдік хабарлауынша, сот талабы орындалып, заңсыз нысан бүгінгі күні толығымен сүрілген.

Айта кетейік, шілде айында әкімдік Алматы бөктерінде заңсыз салынған таунхаустың сүрілгенін хабарлаған болатын. Бұл нысан иесі де ғимаратты рұқсат қағазынсыз тұрғызған. Оның алдында дәл осындай себеппен Orda City тұрғын үй кешені бұзылған еді.