Астанада 1 сыныпқа 31 мың оқушы барады
Астана қаласында 2025-2026 оқу жылында 1 сыныпқа 31 мың оқушы барады. Бұл туралы елорданың Коммуникациялар қызметінде өткен брифингте қалалық Білім басқармасы басшысының орынбасары Маржангүл Қайырбаева айтқан.
«Жаңа 2025-2026 оқу жылында жалпы білім беретін мектептердің бірінші сыныбына 31 мың баланы қабылдау жоспарланған болатын. Бүгінгі күні 30 057 бала қабылданды, оның ішінде мемлекеттік мектептерге 26 666, жекеменшікке 3 190 мың үш жүз тоқсан бала қабылданды», – деді басқарма өкілі.
Қайырбаеваның айтуынша, Астана қаласында 2025-2026 оқу жылында 206 орта білім беретін ұйым бар, оның ішінде 122-сі – мемлекеттік, 77-сі – жекеменшік, 7-еуі – республикалық екен.
Жалпы алғанда қалада осы жылы мектепке баратын оқушылар саны 310 мыңнан асады деп жоспарланып отыр. Өткен жылы Астана мектептеріне 288 мың оқушы барған. Оның 28 мыңға жуығы 1 сыныпқа барған.
Сонымен бірге Білім басқармасы 30 қыркүйекке дейін әлеуметтік осал санатқа жатқылызған отбасылардың балаларына мектеп қажеттіліктеріне 46 мың теңгеден материалдық көмек көрсетілетінін де айтты.
Бұдан бөлек 2 тамыздан «Мектепке жол» акциясы басталған. Бұл акция барысында 8,5 мыңнан астам бала демеушілер есебінен мектепке қажетті ззаттармен қамтамасыз етілген.
