Ресей инфляциясы Қазақстан экономикасына теріс әсер ете ме – ҰБ төрағасы жауап берді

Ресейде инфляция қарқын алып барады. Көрші елдегі инфляция Қазақстан экономикасына қалай әсер етеді? Ресей инфляциясының елдегі азық-түлік бағасына әсері бола ма? Бұл сұраққа базалық мөлшерлемеге қатысты өткен брифингте Ұлттық Банк төрағасы Тимур Сүлейменов жауап берді.

«Қазіргі таңда сарапшылар Ресейде инфляция қарқын алады деп топшылап отыр. Ресей инфляциясының импорты Қазақстанға қалай әсер етеді? Қанша дегенмен біздің импорттың 30%-ы сол елден келеді», – деді журналист.

Сүлейменов Ресейдің азық-түлік инфляциясына қатысты нақты есеп жүргізілмегенін айтты. Десе де, ол елдегі инфляциялық ахуалдың Қазақстанға қалайда әсері болатынын жасырмады.

«Сандар мәнінде нақты ештеңе айта алмаймыз. Бірақ жалпы алғанда, әсері болады. Экономикада қарапайым нәрсе жоқ. Бұл күрделі құбылыс. Өйткені қандай да бір өзгеріс қаржылық салаға жақсы әсер етсе, ауыл шаруашылығына теріс әсер етуі мүмкін. Ал ауыл шаруашылығы үшін тиімді дүние, энергетика саласы үшін тиімсіз болуы мүмкін. Яғни экономиканың әр саласына әсері қандай болатынын бағамдап алу керек», – деді Сүлейменов.

Осы орайда айта кетсек, Халықаралық валюта қорының (ХВҚ) болжамына сәйкес, 2025 жылдың қорытындысы бойынша Қазақстанның жан басына шаққандағы ЖІӨ көлемі 14 770 долларға жетеді. Ал Ресейде бұл көрсеткіш – 14 260 долларды құрайды. Бұл өткен 2024 жылығы көрсеткіштен әлдеқайда төмен. Бұл жылы Ресейдің жан басына шаққандағы ЖІӨ-сі Қазақстаннан 4,6%-ға жоғары болған. Ал 2025 жылы Ресейдің жан басына шаққандағы долларлық ЖІӨ-сі 3,6%-ға қысқаруы мүмкін.

Бұл көрсеткіштер Қытайда да төмен болып шықты. Онда ЖІӨ-нің жан басына шаққандағы көлемі 13, 69 мың долларды құрады.