«Қайраттың» бас бапкеріне Hyundai Palisade көлігі сыйға тартылды

Алматылық «Қайрат» футбол клубының бас бапкері Рафаэль Уразбахтинге жаңа Hyundai Palisade автокөлігінің кілті табысталды. Автокөліктің бағасы 33,8 млн теңгеден басталады.

«Astana Motors» компаниясының негізін қалаушы Нұрлан Смағұлов клубтың Чемпиондар лигасының топтық кезеңіне шығуына орай бапкерді осылайша марапаттады.

«Біз «Қайраттың» Еуропаны таңғалдыра алатынына сенеміз. Алда Алматыда өтетін мадридтік «Реалға» қарсы тарихи матч бар. Бұл – әлемдік деңгейдегі оқиға. Сіздерге жанкүйер боламыз», – деді Смағұлов.

Клуб президенті Қайрат Боранбаев команда жетістігін Уразбахтиннің еңбегімен байланыстырды.

Анарбеков те назардан тыс қалмады

«Селтикке» қарсы матчтың қаһарманы атанған қақпашы Темірлан Анарбеков те марапатталды. Оған Нұрлан Смағұлов Apple MacBook сыйлап, ризашылығын білдірді.

Еске салайық, кеше Монакода Чемпиондар лигасы 2025/26 маусымының жеребесі тартылды. Оның қорытындысы бойынша «Қайрат» өз алаңында мадридтік «Реал», бельгиялық «Брюгге», гректің «Олимпиакосы» және кипрлік «Пафоспен» ойнайды.