Энергетика министрлігі конституцияның 30 жылдығына орай үздіктерді марапаттады

Қазақстан Республикасы Конституциясының 30 жылдығына орай Энергетика министрлігінде салтанатты жиын өтіп, энергетика саласының үздік қызметкерлері марапатталды.

Энергетика министрі Ерлан Ақкенженов құттықтау сөзінде Ата заңның тәуелсіз Қазақстанның мемлекеттік құрылымының ғана емес, экономикалық қуатының да берік іргетасы екенін атап өтті.

«Конституция – біздің мемлекетіміздің және экономикалық қуатымыздың негізі. Энергетика саласы – осы экономиканың тірегі. Өнеркәсіптің дамуы, әлеуметтік сала, халықтың әл-ауқаты – барлығы энергетикаға байланысты. Әрбір көрсеткіштің артында біздің мамандардың күнделікті еңбегі тұр. Бүгін біз олардың ел дамуына қосқан зор үлесін құрметтейміз», – деді министр.

Мемлекет басшысының Жарлығы бойынша мемлекеттік қызмет пен экономиканы дамытуға қосқан үлесі үшін бірқатар қызметкерлер «Қазақстан Республикасының Конституциясына 30 жыл» мерекелік медалімен марапатталды:

• Гүлзина Анасова – отын-энергетикалық кешенді цифрландыру басқармасының басшысы;
• Дәулет Арықбаев – Мұнай тасымалдау және қайта өңдеу департаментінің директоры;
• Бибігүл Рахымберліна – ҚАЭНК қаржы және мемлекеттік сатып алу басқармасының басшысы;
• Ботакөз Советқызы – Өтініштерді қарау және орындауды бақылау департаментінің директоры.

Сонымен қатар, жоғары кәсіби шеберлік танытқан бірқатар қызметкерлер ведомстволық «Мұнай-газ кешенін дамытуға қосқан үлесі үшін» медалімен марапатталды.

Жиын соңында министр Ерлан Ақкенженов барлық сала қызметкерлеріне алғысын білдіріп, олардың адалдығы мен еңбегінің ел экономикасы мен энергетикасының тұрақты дамуына негіз болып отырғанын айтты.