Жылжымайтын мүлік қоры Forbes тізіміндегі екі миллионерді дивидендсіз қалдырды
Жылжымайтын мүлікке инвестиция салатын «Алматы Логистик Центр» (АЛЦ) қоры 2024 жылға қарапайым акциялар бойынша дивиденд төлемейтінін хабарлады. Бұл ақпарат Қазақстан қор биржасының (KASE) сайтында жарияланды.
Қордың акциялары мына компанияларға тиесілі: Arcada – 42,5%, «Алпроф» – 12% және «НӘЗІР INVEST» – 42,5%. «НӘЗІР INVEST» компаниясы «РВС»-ке, сондай-ақ кәсіпкерлер Ершат Сәлімов пен Владимир Сидельковский иеленеді.
Екеуі де Forbes тізімінде Қазақстанның ең бай 75 адамының қатарында: Сәлімовтің байлығы 115 млн доллар, Сидельковскийдікі – 112 млн доллар. Олар бірге басқа да жобаларға, соның ішінде «ЦУМ» жылжымайтын мүлік қоры мен «Рахымжан – Петролеум» компаниясына иелік етеді.
Arcada компаниясының иесі – Алексей Нефедов. Ол Forbes-тің 2024 жылғы ең ірі жалға берушілер рейтингінде 8-орынға кірген. Оның компаниясы Астанадағы Asia Park, Алматыдағы Mart, Asia Park және Mart Village сауда орталықтарын басқарады.
«Алпроф» компаниясының қожайыны – Ғабдулхәкім Жашыбеков. Бұған дейін ол Президент әкімшілігінің құқықтық бөлімін басқарған және «Хоргос» халықаралық шекара маңы ынтымақтастығы орталығының президенті болған.
АЛЦ-тың негізгі жұмысы – сауда орталықтарын, қойма мен кеңселерді және жер учаскелерін жалға беру. Бірақ 2024 жылғы аудит есебінде компанияның қаржылық жағдайы тұрақсыз екені көрсетілген: міндеттемелері активтерінен 895,5 млн теңгеге артық. Соған қарамастан, өткен жылы қордың таза табысы 108,4 млн теңгені құрады.
Сәлімов пен Сидельковский қордың акционерлері атанғанына бірнеше ай ғана болды. Осы уақыт ішінде АЛЦ артықшылықты акциялар бойынша кепілдендірілген төлемді 1 250 теңгеден 1 500 теңгеге дейін көтерді.
